Екі күнге созылған басқосуға еліміздің барлық өңірінен бөлек Ресей, Украина, Италия және Аустрия сияқты елдерден мамандар жиналып, неврология, нейрохирургия, реаниматология және оңалту саласындағы өзекті мәселелерді талқылады.
Инсульт мәселелері жөніндегі республикалық үйлестіру орталығының директоры, нейрохирург Ержан Әділбековтың баяндауынша, еліміздегі инсульт алғандардың саны 40 мыңнан асады. Оның 85%-ы – ұйыған қан түйіршіктерінің (тромб) ми қан тамырын бітеуінен пайда болатын ақ (ишемиялық) инсультке шалдыққандар. Мамандар инсульттің бұл түрін тек алғашқы 3 жарым сағатта ғана емдеуге мүмкіндік бар екенін айтады. Яғни, бет-аузы қисайып, тілі күрмеліп, аяқ-қолы жансызданған адам бірден жедел жәрдем көмегіне жүгінген абзал. Сондықтан да жедел жәрдем қызметін дамыту аса маңызды. Әсіресе ауылдық жерлердегі жедел жәрдем қызметін сынға алған Денсаулық сақтау министрлігі Медициналық көмекті ұйымдастыру департаментінің директоры Асқар Хорошаш бұл бойынша министрліктің арнайы бағдарлама дайындап жатқанын да жеткізді.
Бұл дертке ұшырағандарды жас ерекшеліктеріне қарай жіктейтін болсақ, 4%-ы 16-40 жастағы, 37%-ы 41-60 жастағы, 31%-ы 61-70 жастағы адамдар болса, ал қалған 28%-ы 70-тен асқан қарттар екен. Сондай-ақ 40-70 жас аралығындағы науқастардың 68%-ын ер кісілер құрайды. Қазіргі кезде инсульт алғандардың 5 мыңы алғашқы 10 күнде өмірімен қош айтысса, 5 мыңы бір ай ішінде бақилық болады екен.
Бүгінде елімізде 58 инсульт орталығы жұмыс істейді. Соңғы үш жылда жыл сайын 10 орталықтан ашылып отырғанына қарамастан инсульт алғандардың саны азаймай отыр. Мысалы, 2017 жылы еліміз бойынша 100 мың адамға шаққанда 227,7-сі осы дертпен ауруханаға жеткізілсе, өткен жылы бұл көрсеткіш 229,7 адамға жеткен. Мамандар аталған дерттің дендеуіне тосқауыл қою үшін алдын алу шаралары өте маңызды екенін алға тартады. Әсіресе саламатты өмір салтын сақтау – денсаулықтың кепілі. «Бізде емханаларда саламатты өмір сүру кабинеті бар және ол тегін, әрбір пациентке қолжетімді. Бұл көптеген елде жоқ. Сонда инсульт мектебі, инфаркт мектебі сияқты неше түрлі мектептер бар. Бірақ халық ол жерге бармайды, дәрісін тыңдамайды. Кәмелетке толған әрбір адам сол кабинетке барып, болмағанда 12 сабағын тыңдауы тиіс», дейді Инсульт мәселелері жөніндегі республикалық үйлестіру орталығының бас маманы, невролог дәрігер Зәуреш Ахметжанова.
Италиядан келген невролог Франческа Романа да аурудың алдын алу ерекше маңызды екенін айтады. «Италияда 68 млн халық тұрады. Жыл сайын 107 мың адам инсультке шалдығады. 200 инсульт орталығы бар. Соңғы 20 жыл ішінде бұл ауруға шалдығатындардың саны 45 мың адамға азайды. Осы көрсеткішке жету үшін әр дәрежедегі мемлекеттік органдар барынша күш салды және алдын алу шаралары тыңғылықты жүргізілді. Әсіресе темекі тартуды шектеу сияқты саламатты өмір сүру салтын дәріптеудің нәтижесі көңілден шықты. Осы арқылы инсультке шалдығатындардың санын азайтсақ, жаңа әдіс-тәсілдерді енгізу арқылы мүгедек болып қалатындарды азайттық. Бізде емханалардан бөлек, зауыт сияқты кейбір қызмет орындарында да инсульттің алдын алу кеңселері жұмыс істейді», дейді профессор Франческа Романа.
Конференцияны ұйымдастырушылар Жастар жылына орай биыл тұңғыш рет «Жас невролог» байқауын өткізді. Оған еліміздің әр аймағынан 20 невролог келіп қатысып, өз тәжірибелерін баяндады. Жас мамандардың осы салаға көптеп келуін және олардың бәсекеге қабілеттілігін арттыру мақсатында өткен байқауды ұйымдастырушылар дәстүрге айналдыруды көздеп отыр.