Жүрек жұтқандары әжептәуір биіктікке көтеріліп, шыркөбелек айналғанды ұнатса, тәуекел ете бермейтіндері қызықтаумен ғана шектеледі. Жыл өткен сайын осында орналасқан аттракциондар паркінің әлеуеттік қуаты артып, жаңа құрылғылармен толығып келеді. Осыдан бірнеше жыл бұрын «Даму» кәсіпкерлікті қолдау қоры арқылы жеңілдікті несиемен бірнеше әткеншек сатып алынса, енді сервистік қызметтің сапасын жақсартуға бет бұрған тәрізді.
«Мир аттракционов» ЖШС-нің директоры Александр Козловтың айтуынша, жаңа жүйе енгізілгелі бір орталықтан басқару мүмкіндіктері әлдеқайда жеңілдеген. Функционалды операциялар «R-Keeper» бағдарламасы арқылы атқарылады. Демалушылар енді әр кассаға жүгіріп, әуре болмайды. Бұл да бірыңғай төлем картасының артықшылығы. 10 миллион теңгенің құрылғысы пайдамен жұмыс істейтініне еш күмәніміз жоқ. Қазірдің өзінде шығынымызды едәуір азайтып отырмыз, дейді ол.
Петропавл демалыс және мәдениет саябағы еліміздегі ең үздіктердің қатарында. Аумағы абаттандырылып, қарағай, қайың, емен ағаштары жайқала өсіп тұр. Кезінде «Хрустальное колесо», «Золотой пони Москва» секілді айтулы халықаралық байқауларда жүлдегер атанғаны тегін болмаса керек. Осы себепті болар, 32 аттракцион қалалықтарға мінсіз қызмет етіп тұр. Бір маусымда орта есеппен 70-75 мыңдай адам серуендеуге келетін көрінеді.
Бір «әттегенайы», өткен жылдан бері аттракциондық қондырғыларды міндетті сертификаттау талабы енгізілгелі шетелдік стандарттар жарамсыз болып қалыпты. Ал Қазақстанда аттракциондық техникалар шығарумен айналысатын кәсіпорындар жоқтығы материалдық-техникалық базаны жаңалауға қолбайлау болып отырған тәрізді. Қаражат табылғанына қарамастан...
ПЕТРОПАВЛ