Қазақстанда ұшу аппараттарын шығару туралы ұзақмерзімді келісім-шартқа қол қойылды. Дәлірек айтқанда, «Қазақстандық авиаиндустрия» ЖШС мемлекеттік қорғаныс тапсырысын орындау аясында ұшқышсыз басқарылатын ұшу аппараттарын шығару туралы және техникалық қызмет көрсету жөнінде «Elbit Systems Ltd.» (Израиль) компаниясымен келісімшарт жасасты.
Сондай-ақ Қазақстан аумағында «Elbit Systems Ltd.» компаниясының тауарлық белгісін пайдалануға айрықша құқық беретін лицензиялық келісімге қол қойылды.
Қазақстандық авиаиндустрия – әуе аппараттарына техникалық қызмет көрсету, жөндеу және оларды жетілдірумен айналысатын кәсіпорын. Кәсіпорынды «Қазақстан инжиниринг» ҰК» АҚ және «Қамқор Менеджмент» ЖШС бірлесіп дамытуда.
– Бұл жоба ұшу аппараттарын сатудан бөлек, оларды жөндеу және баптау жөнінен басқа елдерге деген тәуелділікті азайтады. Сонымен бірге білікті отандық мамандарды даярлауға және жаңа жұмыс орындарын ашуға да мүмкіндік береді, – дейді «Қазақстан инжиниринг» ҰК» АҚ басқарма төрағасы Қуаныш Бишімов.
Қазақстандағы осы ұшу аппараттарын ықтимал пайдаланушылар арасында жүргізілген сұрау (Қорғаныс министрлігі,Ұлттық қауіпсіздік комитетінің Шекара қызметі, Ауыл шаруашылығы министрлігі, Ішкі істер министрлігі және мұнай-газ саласының компаниялары, т.б.) отандық өндіріс пен жергілікті техникалық қызмет көрсету болғанда ғана аталған өнімге деген сұраныстың артатынын көрсетті.
Сонымен қатар халықаралық талдау да ұшу аппараттар нарығының жыл сайын ұдайы кеңейіп келе жатқанын байқатып отыр.
Қ.Бишімовтің айтуынша, бұл кәсіпорын Қазақстанда ұшу аппараттарын шығару, техникалық қызмет көрсету және жетілдіру жөніндегі ірі орталыққа айналуы керек. Болашақта отандық өнімді экспортқа шығару да жоспарда бар.
Осы жылдың соңына дейін ұшқышсыз басқарылатын ұшу аппараттарын шығаруға арналған құрал-жабдықтардың алғашқы партиясы келіп жетпекші.