Кеше елордада Nur Otan партиясының республикалық қоғамдық қабылдау бөлмесінде Ішкі істер министрі Ерлан Тұрғымбаев бірқатар азаматтың өтініш-тілектерін тыңдады.
Қоғамдық қабылдауда Ішкі істер министрі Ерлан Тұрғымбаев азаматтарды жеке-жеке қабылдап, бәріне тұщымды жауап қайтарды. Сондай-ақ басқа өңірлерден онлайн режімде байланысқа шыққандардың айтқанына құлақ түрді.
Іс-шара барысында министр зорлық жасағандарды жазалауға қатысты пікір білдірді.
– Адам зорлау қылмысының жазасы заңнамалық жағынан жан-жақты бекітілген. Арнайы баптың бірінші, екінші, үшінші бөлімдері бар. Топтық зорлау жеке қарастырылған. Барлығында жаза – қатаң. Бір бапта жеңіл, бірінде қатаң деп айту екіталай. Әр жағдайға жеке-жеке қарау керек. Адам зорлау – ауыр қылмыс. Мұнда азамат ретінде де, әйел ретінде де зәбірленушінің жеке еркіндігіне қол сұғылып, ар-намысы тапталады. Сондықтан ауыр қылмыстың жазасы да ауыр болуы керек, – деді Ерлан Тұрғымбаев.
Министр БАҚ өкілдеріне Қылмыстық-процестік кодекске өзгертулер мен толықтырулар енгізілуі мүмкін екенін айтты. Қазір Бас прокуратура Ішкі істер министрлігімен бірігіп, осы мәселені қарастырып жатыр екен. Оның ішінде түзету мекемелеріне қатысты өзгерістер бар. Қолданыстағы Қылмыстық-атқару кодексіне 60-тан аса өзгеріс енгізу ұсынылыпты. Енді Бас прокуратураға жолданған ұсыныстар Парламентте талқыланбақ.
Сонымен қатар Ерлан Тұрғымбаев газ баллоны жарылуы салдарынан ата-анасынан айырылған Екібастұз тұрғынының арызынан кейін Павлодардың полиция қызметкерлерін қатты сынап, мәселені қайта қарауды тапсырды. Жалпы бұл облыста тұрғындардың жиі шағымданатынын айтқан министр сақшыларды жазалайтынын, тіпті жұмыстан да шығаратынын жеткізді.