Шілде айының аяғында Чешенстанның астанасы Грозный қаласында Чешен Республикасының тұңғыш президенті, Ресей батыры Ахмад қажы Қадыровты еске алуға арналған жекпе-жектің ММА түрінен балалар арасында халықаралық жарыс өткен болатын. Осы жарысқа Қазақстанның намысын қорғауға барған оралдық балалар қала көшесінде Чешенстан Республикасының президенті Рамзан Қадыровпен кездесіп қалып, бірге суретке түскен.
2007 жылы Жымпитыда дүниеге келген Мансұр Нұрлыбекұлы Орал қаласындағы №34 мектепте оқиды. Үш жылдан бері таэквондоға қатысады. Жаттықтырушы, Батыс Қазақстан облыстық таэквондо федерациясының президенті Аралбек Ахметовтің шәкірті осы жылдар ішінде Қазақстаннан бөлек, Беларусь, Ресей Федерациясы төрінде төселген татамилерде мықтылығын дәлелдеп, халықаралық жарыстардың чемпионы болып үлгерді. Мансұр Нұрлыбекұлы биыл таэквондодан Азия кубогының иегері атанды.
11 жасар жеткіншек кейінгі уақытта аралас жекпе-жекпен айналысып жүр. Тордағы төбелес тарландарының отаны саналатын Грозныйдағы жарысқа жолдама алудың өзі оның спорттың бұл түрінен де осал еместігін білдіреді. Жарысты ұйымдастырған «AKHMAT» жекпе-жек клубы бүгінде әлемге танымал. fightnews.info сайтының мәліметінше, осы клубтың 6 жауынгері UFC лигасына тіркелген.
Чешенстан астанасында салмағына сай қарсылас болмауына байланысты біздің батыр жекпе-жек өткізе алмады. Бірақ Рамзан Қадыровпен кездесу ол үшін ең бір елеулі оқиға болды.
Біз Мансұрдың өзіне хабарласып, кездесудің қалай болғанын сұрадық:
– Жарыстан кейін жаттықтырушымызбен бірге Грозныйдың көрікті жерлерін тамашалап, қыдырып жүргенбіз. Рамзан мырза да кешкі қалада велосипед теуіп, серуендеп жүр екен. Қасымыздағы ата-ананың бірі оған «Қазақстаннан сәлем!» деп айқайлады. Рамзан Қадыров бізді естіп, жанымызға келіп тоқтады.
– Қазақтарға қалай тоқтамаймын?, – деп жымиды сосын. Біз қуанып кеттік.
Чешен халқының басшысы өте кішіпейіл әрі қазақ халқын ерекше құрметтейді екен. Бәрімізбен жеке-жеке суретке түсті. Тіпті, топ болып суретке түскенде, ол біздің Көк туымызды көтеріп тұрды. Қазақтарға дұғай сәлем жолдап бізді қонаққа шақырды. Қазақ меймандарға чешендер «Васаби» мейрамханасында дастарқан жайды.
Чешенстан Республикасының президентімен кездесуімді, жасаған селфиімді көріп бәрі қуануда. Бұл да бір тарих қой!, – дейді Мансұр Нұрлыбекұлы.
Жеткіншек аптаның 6 күнін жаттығу залында өткізеді. Ол демалыстың өзінде де уақтылы жүгіріп, футбол ойнап, кермеге тартылып, бабын жоғалтпаудың амалын жасап жүр. Өзінің айтуынша, оның бәрі Олимпиада чемпионы болу үшін керек.
Бауыржан ШИРМЕДИНҰЛЫ,
журналист
Батыс Қазақстан облысы