Қазақстан Республикасының Конституциясы күні қарсаңында облыстық Әділет департаменті бірқатар маңызды шараны күні бұрын қамтып, көпшілікпен белсенді жұмыс жүргізуде.
Кейбір азаматтар да заң талаптарын тап-тұйнақтай етіп орындай бермейді. Өз ісіне немкетті, шаруасына шалағай. Уақыт өткізіп барып әділдік қумақ. Ондайлар көп-ақ. Тегін заң қызметін көрсету бүгінгі күнгі көпшілік көкейінде жүрген ойды дөп басқандай. Барлық шара өмірдің өзінен туындаған жайларды қамтып отыр. «Негізгі Заң аптасы» жобасы аясында халыққа тегін заң көмектерін көрсету қолға алынды.
Республикалық акция шеңберінде аумақтық нотариалдық палата нотариустері және облыстық адвокаттар алқасы адвокаттарының қатысуымен облыс орталығында, сондай-ақ барлық аудандарда кең ауқымды жұмыс жүзеге асырылуда. Алдымен БАҚ арқылы халықты құлақтандырып, өз қызметтері жайында хабардар етіпті.
– Кәдімгі қарапайым тіршілікте әлеуметтік немесе қаржылық қиын жағдайға тап болған азаматтар адвокаттар немесе заң кеңесшілерінен өзінің құқықтық жағдайын толық сүйемелдеу үшін ақысыз көмек алу заңда көзделген, – дейді облыстық Әділет департаменті басшысының міндетін атқарушы Бақытжан Өмірзақов, – ал бұл жолғы іс-шараларымыз заң көмегінің ашықтығын, әділдігін және сапасын көтеру мақсатында болып отыр.
Шынында да заң көмегіне зәру жандар аз емес екен. Қылмыстық істер жөніндегі мамандандырылған ауданаралық заңдық кеңес беру орталығының меңгерушісі Асқар Ақпаровтың айтуына қарағанда, көмек сұрап келетіндердің дені алдымен алимент өндіру, мүлік құқығы, несие төңірегінде екен.
– Біз, адвокаттар Асқар Әміржанов, Бақытжан Құсайынов үшеуіміз облыстық Nur Otan партиясы филиалының ғимаратында қала тұрғындарын қабылдап, кеңес бердік, – дейді Асқар Ақпаров, – көп жайда әлі де болса азаматтардың заң талаптарын жетік меңгере қоймағандықтары байқалады. Екінші бір мәселе, құжаттарға ыждаһатты болу жайы. Негізі келіспеушілік болмау үшін кез келген істі бастар алдында өз шаруаларына қатысты заң талаптарын жан-жақты түйсініп, мамандардан кеңес алып барып бастау қажет екендігін ескере бермейміз. Егер барлығы заң аясында болса, қиындыққа тап болмас еді. Қабылдау өткізген күні заң көмегіне жүгінгендер толыққанды кеңес алды.
Келушілер әлі де аз емес екен. Көмек сұрай келген бір азаматпен жолықтық. Оның мәселесі мұраға қалған пәтердің кімге тиесілі болатындығы жөнінде екен. Ұзаққа созылған, әділ шешімін табу оңайға түспейтін шым-шытырық іс. Араағайынның ақылымен шешілмеген соң заңға жүгінбек.
Акция барысында қаншама адам көптен бері қордаланып қалған мәселелерінің мәнісін анықтап, бір арылып қалды.
Ақмола облысы