«Самұрық-Қазына» ҰӘҚ» АҚ Арыс қаласының 16 орта мектебін 100%-ға қалпына келтірді. Салтанатты алғашқы қоңырау жиыны қаланың барлық мектептерінде жоспар бойынша 1 қыркүйек күні өтті. 10 мыңнан астам оқушы күрделі жөндеуден кейін жаңартылған мектептерде оқу жылын бастап кетті.
Жөндеу жұмыстарымен қатар, қордың бастамасымен мектептерде ағаш терезелер пластиктен жасалған терезелерге, ескі футбол алаңы жаңасына ауыстырылды. Сондай-ақ қалпына келтірілген барлық мектептер жаңа мектеп жиһазымен жабдықталды. Сонымен қатар қосымша жаңа мектеп мүкәмалы сатып алынды.
«Біз әлеуметтік инфрақұрылымның 68 нысанын қалпына келтірдік. Бірақ жаңа оқу жылын ескере отырып, мектептерге ерекше назар аударылды. Бүгін бұл тек оқушылар мен олардың ата-аналары үшін ғана емес, сонымен қатар біз, құрылысшылар үшін де мереке», – деді «Samruk-Kazyna Construction» АҚ Басқарма төрағасының бірінші орынбасары Арман Жетпісбай.
Айта кеткен жөн, 1 шілдеде қор 16 мектеп, 36 балабақша, 8 денсаулық сақтау нысаны, 4 спорт нысаны, колледж, темір жол вокзалы, Даңқ аллеясы және орталық алаң сияқты қираған әлеуметтік нысандарды жөндеу жұмыстарын бастады.
Бүгінгі таңда Арыс қаласында қор қалпына келтіретін 68 әлеуметтік инфрақұрылым нысандарының 63 нысаны пайдалануға берілді. Қайта қалпына келтірілген қалған 5 нысан қыркүйек және қазан айларында тапсырылады. Оның қатарында жедел медициналық көмек және стоматология бөлімшелері, вокзал, балалар жасөспірімдер спорт мектебі мен балабақша бар.
Арыс қаласын қалпына келтіру және құрылыс жұмыстарына қор 7 млрд теңге бөлді. Қордың атынан жобаның операторы – «Samruk-Kazyna Construction» АҚ.