Атмосфералық ауаның ағымдағы жағдайы туралы ақпарат енді Павлодар, Екібастұз, Петропавл және Ақтау қалаларының Led-экрандарында қолжетімді болады. Бұл туралы Экология, геология және табиғи ресурстар министрлігі Facebook парақшасында мәлімдеді.
«Трансляциялау үшін мәліметтер «Қазгидромет» РМК аймақтық филиалдарымен «AirKz» мобильді қосымшасының көмегімен ұсынылып, әр үш сағат сайын жаңартылып отырады. Бұл жоба «Қазгидромет» РМК, облыстық әкімдіктер мен Led-экрандары бар жеке меншік ұйымдардың қатысуы арқылы мүмкін болды», деп жазды министрлік.
Павлодар қаласында ақпарат Сәтпаев-Кривенко, Сәтпаев-Торайғыров, Кутузов-Естай көшелерінің қиылысында, Теміржол вокзалы ғимаратының ішінде, Екібастұз қаласында Ленин көшесінде, Ақтау қаласында 4 және 14 шағын аудандарындағы экрандарда, Петропавл қаласында оқушылар сарайының экранында трансляцияланады.
«Келесі айда атмосфералық ауаның жай-күйі туралы ақпаратты Ақмола, Қостанай, Батыс Қазақстан, Шығыс Қазақстан, Алматы және Жамбыл облыстарының Led-экрандарында шығару жоспарда. 2020 жылы жоба Ақтөбе, Атырау, Қарағанды және Қызылорда облыстарында, сондай-ақ Нұр-Сұлтан, Алматы, Шымкент қалаларында іске асады», делінген хабарламада.