Студенттер арасында жең ұшынан жалғасқан сыбайлас жемқорлыққа жол бермеу мақсатында «Парасыз сессия», «Таза сессия», «Адал жол», акциялары тұрақты түрде ұйымдастырылып, «Сыбайлас жемқорлықтың алдын алу» тақырыбында семинар өтіп тұрады.
Осы бастамаға орай, Алматыдағы Қазақ ұлттық қыздар педагогикалық университетінің студенттері Мемлекеттік қызмет істері және сыбайлас жемқорлыққа қарсы іс-қимыл агенттігінің «Sanaly urpaq» республикалық жобалық кеңсесінің басшысы Қайыржан Токушевпен кездесті.
Жиында Қ.Токушев Жобалық кеңсенің негізгі қызметі туралы баяндап, оны жоғары оқу орындарында ашудағы мақсаты мен міндетін айтты.
– Ұрпақ тәрбиесі ең алдымен мектеп пен университет қабырғасында қалыптасады. Баланың дүниетанымының, өмірге деген көзқарасының, қоғаммен қарым-қатынасының бастауында ата-анасы мен ұстаздары үлкен рөл атқарады. Сондықтан жастар тәрбиесіне бәріміз жауаптымыз. Кез келген оқу орны үшін сапалы білім бірінші кезекте тұруы тиіс. Міндетіміз – қоғамның жегі құртына айналған сыбайлас жемқорлыққа қарсы алдын алу шараларын жүргізу, ортақ әдіс-тәсілдер енгізіп, жастармен жан-жақты жұмыс істеу. Сонымен қатар еліміздің білім беру жүйесі арқылы жемқорлыққа қарсы мүлдем төзбеушілікті қалыптастырудың ең үздік тәжірибесі екенін көрсетіп, одан бас тартатын ортаны кеңейту басты мақсатымыз, – деді Қ.Токушев.
Кездесу барысында Қыздар университетінің 100 студенті «Sanaly urpaq» республикалық жобалық клубына мүшелікке қабылданды.
Басқосуды оқу орнының Әлеуметтік даму жөніндегі проректоры міндетін атқарушы Жаңагүл Сұлтанова қорытындылап, университетте сыбайлас жемқорлықпен күрес бағытында атқарылып жатқан жұмыстарға тоқталып өтті.
Оның айтуынша, университеттің тәрбие, оқу және ғылым үдерісінде әдептілік қағидаларын сақтау басты назарға алынған. Бұл тұрғыда «Сыбайлас жемқорлыққа қарсы мәдениет негіздері» атты пән оқу бағдарламасына енгізілді. Аталған пән студенттердің саналы түрде және адамгершілікпен сыбайлас жемқорлыққа қарсы мәдениетті қалыптастырады.
Кездесу аясында Қ.Токушев студенттердің өзін өзі басқару және демалыс орнының қызметімен танысты. Оқу орнының бас ғимаратының базасында жақында ашылған бұл орталықта білімгерлер өздерін жан-жақты дамытып, қоғамдық белсенділігін арттыруға мүмкіндік алмақ. Сондай-ақ түрлі бастамалар мен жобаларды іске асыруды талқылайды.
АЛМАТЫ