Назарбаев Университетке қарасты Мемлекеттік саясаттың жоғары мектебі мемлекеттік басқарудағы өзекті мәселелерді талқылауға негізделген конференция ұйымдастырды. «Мемлекеттік басқару секторындағы ақпараттық технологиялар» атты конференцияға мемлекеттік мекемелер мен мемлекеттік емес ұйымдардың басшылары, ақпараттық технология саласындағы белгілі азаматтар қатысты.
Конференция бірнеше блокқа бөлінген. Әр блок әртүрлі тақырыпқа арналған. Ұйымдастырушылардың айтуынша, негізгі концепті театрмен байланыстыруға тырысқан. Бәрімізге белгілі, театр киімілгіштен басталғандай, конференцияның да алғашқы тақырыбы қауіпсіздік шараларына қатысты болды. Осы орайда Kaspersky компаниясының Орталық Азиядағы атқарушы директоры Евгений Питолин «Цифрлы мемлекет: жаңа қорғаушылар» тақырыбында баяндама жасап, цифрландыру саласындағы жаңалықтармен бөлісті. Сонымен қатар Цифрлық даму, инновациялар және аэроғарыш өнеркәсібі вице-министрі Асхат Оразбек, Білім және ғылым вице-министрі Рүстем Биғари де қатысушылармен кибершабуыл, киберқауіпсіздік құралдары мен технологиялары тақырыбын талқылады.
Конференцияның екінші бөлімінде ақпараттарға шабуыл жасау, БАҚ пен медиа саласындағы шабуылдар, жалған ақпаратты тексеру, киберқауіпсіздікті мемлекеттік дәрежеде шешу мен билік өкілдерін оқыту, біліктілігін арттыру мәселелері төңірегінде әңгіме өрбіп, қатысушылар Ақпарат және қоғамдық даму министрлігінің өкіліне, «БЗЖҚ» АҚ өкіліне сұрақтарын қойды. Ақпарат комитеті төрағасының орынбасары Михаил Комиссаров Халыққа қызмет көрсету орталығындағы жаңа технологиялар мен аталған сектордағы киберқауіпсіздік туралы баяндама жасады. Оның айтуынша, бүгінде Халыққа қызмет көрсету орталықтарында кезек азайған. Сарапшы бұған осы саладағы жаңа технологияларды қолдану нәтижесінде қол жеткізілгендігін айтады. Ал «Бірыңғай жинақтаушы зейнетақы қоры» АҚ өкілі Елнұр Шалкибаев аталған ұйымның киберқауіпсіздік пен негативті ақпаратпен күресу тәжірибелерімен бөлісті.
Конференция екі күнге созылды. Microsoft, Astana LRT, Oberig IT сияқты алып компаниялардың өкілдері қатысқан жиында ақпараттық технологиялар саласындағы жас мамандарға сұхбаттасу, тәжірибе жинау секілді мүмкіндіктер жасады.