Жаңа кезең және ұлттық дүниетаным

«Қазақтану» мәдени-ағарту­шылық жобасы аясындағы ша­раға облыс әкімінің орынбасары Наурызбай Байқадамов, ай­мақтағы зиялы қауым өкілдері, облыстық ҚХА құрылымдары мен этномәдени бірлестіктер мү­шелері қатысты.

Шараға келгендерді Қазан­ғап атындағы музыкалық кол­леджі­нің өнерпаздары қобыз кү­йімен қарсы алды. Достық үйін С.Айтбаев атын­дағы көркемсурет га­лер­­еясы қорындағы туындылардан «Кенеп бетіндегі ауыл көрінісі» атты сурет көрмесі ұй­ым­дастырылды.

Бүгінде Қазақстан халқы Ассамблеясының «Қазақтану» жобасы бойынша еліміздің бар­лық аймақтарында шаралар жүйелі ұйымдастырылып келеді. Біртұтас ортақ құндылықтарды қалыптастырудың негізі ретінде қазақ халқының тарихын, мә­дениетін дәріптеуді көздеген бастамаға ел тұрғындарының қызығушылығы ерекше.

– Біздің басты құндылығымыз еліміздегі ынтымақ пен бірлік екендігіне талас жоқ. Елдегі эт­нос­тардың арасына жік түс­пей, бір мақсатқа жұмыла білген­дігіміздің арқасында бүгінгі берекеге жеттік, – деп сөз бастаған облыс әкімінің орынбасары Н.Байқадамов «Қазақтану» жо­басының мән-мақсатын айтып өтті. Осы бағытта атқарылып жатқан жұмыстарды саралады. «Алаштың анасы» атанған өңірде өтіп жатқан конференция жұмысына сәттілік тіледі.

Шарада Темірбек Жүргенов атындағы қоғамдық қор төрағасы Сәпен Аңсатов «Қазақы діни таным және ұрпақ тәрбиесі» тақырыбында баяндама жасап, тақырып аясында пайымды пікірлер айтты.

Филология ғылымдарының докторы, профессор, Қорқыт Ата атындағы ҚМУ жанындағы «Қорқыттану және өлке тарихы» ҒЗИ директоры Бағдат Кәрі­бозұлы «Сыр елі – руха­нияттың бастау бұлағы» тақы­рыбын қозғап, ұлттану бағытында жұмыстар аясын кеңейту жайында ой өрбітті.

Конференцияға Алматы қала­сынан арнайы келген өнертану ғылымдарының кандидаты, Ә.Қас­­теев атындағы мемлекеттік өнер музейінің ғылыми хатшысы Ека­терина Резникова «Образы ко­чевой цивилизации в живописи Казахстана» тақырыбында баяндама жасады. Еліміздегі қыл­қалам шеберлерінің еңбектерін сырт мемлекеттерде насихаттап жүр­ген ғалым қазақтың көшпелі өр­кениетін сурет өнері арқылы танудың маңыздылығы жайлы айтты. Белгілі суретшілер Салихитдин Айтбаев, Қанафия Телжанов, Гүлфайруз Исмаи­лованың осы бағыттағы еңбек­теріне тоқталды.

Филология ғылымдарының кан­дидаты, Қожа Ахмет Ясауи атындағы халықаралық қа­зақ-түрік университетінің қауым­дастырылған профессоры Жа­зира Исаева «Ұлы дала паремиологиясы және ұлттық код» та­қырыбындағы баяндамасында ұлттық таным жаңғыруы үшін ең бірінші тіл жетілуі тиіс деген ойын жеткізді.

Конференция соңында қа­тысушылар еркін пікір алмасып, жоба аясындағы жұмыстар жайлы ұсыныс-пікірлер айтты.

Қызылорда