Ата-жұртынан алыста жүрген бауырларымыздың ұл-қыздарын тәуелсіз мемлекетіміздің бүгінгі жетістіктерімен таныстырып, кемелді болашағын көрсету мақсатында, сонымен қатар жастардың ата-бабалары бір замандары өмір сүрген мекенін таныстыру ниетінде осыдан жеті жыл бұрын “Қазақстан – ата жұртым, қасиетім – ана тілім” атты халықаралық олимпияда жеті жылдан бері үздіксіз өткізіліп келеді. Бұл шара Елбасы Нұрсұлтан Назарбаевтың шетелдердегі қандастарды қолдау жөніндегі 1998 жылғы Өкіміне байланысты жүзеге асырылып келе жатыр. Биылғы олимпияда киелі Жайық өңіріндегі Орал қаласында кеше өз жұмысын бастады. Облыстық драма театрының ғимаратында өткен алғашқы дидарласу кезінде жер ана келбетіндегі ана – қазақтың арғы-бергі тарихын жыр тілінде айта келіп, сахна төріне Күлтегін, Тоныкөк, Тұмар ханым, Сырым батыр секілді алыптарды шығарып, аталы сөздерін айтқызды.
Бұдан кейін төрткүл дүниенің бұрыш-бұрышынан келген ұл-қыздарды, нақтылай түссек Қытай, Франция, Монғолия, Ресей, Өзбекстан, Қырғызстан т.б. мемлекеттерден келген оқушыларды облыс әкімінің орынбасары Нұрлан Ноғаев құттықтап, елім, жерім деп келген жас ұрпақтың осы ата-жұртым деген ілтипатының астарында үлкен жеңістің жатқанын тілге тиек етті. Ал Білім және ғылым министрлігіне қарасты “Дарын” орталығының директоры Т.Битуова жеті жыл ішінде жүздеген жастардың отанына келіп жоғарғы оқу орындарына түскенін, олардың алды қазір қызмет етіп жүргенін жеткізсе қазылар алқасының төрағасы, академик Өмірзақ Айтбаев игілікті шараға ұйтқы болған облыстың азаматтарына шын ниеттен алғысын білдірді .
Салтанатты рәсім үстінде қаладағы мектеп оқушылары әзірлеген ән-күй алма-кезек сахна төрінен көрініс тауып, жиылған жұрттың ерекше ілтипатына ие болды. Ендігі жерде шетелден келген алпыстан аса оқушылардың жүзден жүйрік шыққандарға Білім және ғылым министрлігінің арнайы гранты тапсырылатын болады.
Темір ҚҰСАЙЫН.