Мысты қалада мылтық неге атылды?

Бұл төтенше оқиға 21 қаңтар күні кешкі сағат 18.00-дің шамасында «Қазақмыс» корпорациясы» ЖШС-нің ғимаратындағы кен-байыту комбинатының бас директоры Амангелді Минигуловтің қызметтік кабинетінде болған.

Сол күннің кешінде мынадай ақпа­рат ел ішін кезіп кетті: бас ди­ре­к­тордың кабинетінде кәсіподақ ұй­ы­­мының төрағасы мен ұжым бас­­шысының арасында кикілжің бол­ған да, бір уақытта кәсіподақ көш­бас­шы­сы сыртқа шығып кетіп, ізінше мылтық алып келіп кабинетке қайта кірген. Содан қызметтік бөлме ішінде мылтық атылып, екі адам пышақтан жарақат алып, біреуі сол жерде өзіне өзі қол салып, қаза тапқан...

Енді белгісіздіктің тұманы сейіл­ген­дей болған кездің биігінен қарап және кейінгі ресми мәліметтерді сараптай отырып, мына жайттарды жа­рыққа шығаруға болатын сияқты. «Кәсіп Қорған» кәсіподақ ұйымының төрағасы Тоғызбай Тажбеновтің бас директордың кабинетіне мылтық алып кіргені анық болған жайт: ол бейнебақылау камераларындағы тас­па­ға жазылып қалған. Бұл тегіс ұңғылы мылтық Тажбеновтің атына ресми тіркелген атыс қаруы екен. Сондай-ақ кәсіподақ төрағасы кабинетке кіргеннен кейін әлгі мылтықтың бір рет атылғанын да куәлер растап отыр.

Бұдан кейін бас директор Аман­гел­ді Минигуловтің кабинетінде не болып, не қойғанын тірі жан біл­мей­ді және айта алмайды. Сол жерде болған қанды оқиғаның ресми органдар ұсынған нұсқасы мынадай: Тажбенов төбеге қарата мылтықты бір рет атқаннан кейін, отты қаруды суық қаруға айырбастап, бас директор Минигуловтің арқа тұсынан пышақ ұрған. Сол екі ортада араша түскен Сабыржан Тембаевтың ішіне де суық қаруды сұғып алыпты. Сөйткен де, екі адамның қанына малынған қара пышақты өзінің тура жүрегіне салып, сол жерде жан тапсырған...

Жалпы, бұл оқиға турасында құ­қық қорғау органдары берген мағлұ­мат­тардың мардымсыз болғанын және олардың кешігіп жеткенін айтпасқа болмас. Әрине, оқиға еліміздегі алпауыт кәсіпорындардың біріне қатысты бол­ған соң, тиісті органдардың ақпа­рат­ты сүзгіден өткізіп алу үшін уақыт оздыруға тырысқаны түсінікті жайт. Бірақ мұның жұртты нақты және толық мәліметпен дер кезінде қам­та­масыз ету ісінде қолбайлау бол­ғаны рас еді. Тіпті осының салда­рынан ел ішіне жөн-жосықсыз әңгімелердің, түрлі қауесеттің тарап кеткені де оқи­ға айналасындағы күмәннің бұл­тын қоюлата түскен.

Қазіргі уақытта бұл оқиға төңіре­гін­­де өрбіген долбары көп әңгіме тыйыл­­­май тұр. Әсіресе мына жайт өзіне назар аудармай қоймайды: біле­тін­дердің айтуынша, кәсіподақтың көш­бас­шысы Тоғызбай Тажбенов тумысынан ашушаң адам емес, ұстамды мінезі бар кісі екен. Жұртпен тіл табысып жұмыс істеуді меңгерген, өз ісіне тиянақты маман болса керек. Яғни, оның өзіне өзі қол салуы ақылға сы­йымсыз дегенді айтқысы келеді оның таныстары. Алайда, «Ашу – дұшпан» деген, Тажбеновтің директордың кабинетіне мылтық алып кіргені жо­ға­ры­дағыдай пікір айтушылардың өзін тығырыққа тіреп қойғаны ащы шын­дық...

Мәселенің түйіні енді тарқатылып, оқиғаның көлеңкелі тұстарына сәуле жүгіре бастағанда мынаны айтуды лаж санадық. Зады, қанды оқиғаға әкелген кикілжің табан астында туындамаған. Мәселен, еңбеккерлердің салалық кәсіподақтарының төрағасы Мұрат Мәшкеновтің айтуынша, Минигулов пен Тажбенов арасында біраз уақыттан бері жеке бас араз­дығы болған екен. Ал «Кәсіп Қор­ған» кәсіподақ ұйымы төра­ға­сы­ның орын­басары Жанат Сәменов жо­ға­рыда аталған екі аза­мат­тың ара­сын­дағы кикілжіңге кәсіп­одақ ұжы­мында қалыптасқан күрделі жағ­дай­дың себепші болуы әбден ық­тимал екенін айтады. Оның сөзіне қара­­ғанда, «Кәсіп Қорған» кә­сіп­одақ­­тар ұйымында төраға ұстанған сая­­сат­қа, оның жүргізген жұмысына көп­­шілік­тің көңілі көншімей жүріпті. Ке­ліс­­­пеушіліктер көбейіп, ұжымдағы бе­­ре­кенің кетеуі кете бастаған. Осы­­­ның бәрі биылғы жылдың 5 қаң­­­тарында кәсіподақ ұйымының ор­та­лық кеңесінде болған отырыста кеңі­нен талқыланған екен. Сол жиын­­да кәсіподақтар ұйымының ке­зек­­­­тен тыс съезін алдымыздағы 5 ақпан күні өткізу туралы шешім де қабыл­даныпты. Яғни, күн тәртібіне кәсіп­одақ­тың жаңа төрағасын сайлау мәсе­ле­сі шығарылған болса керек.

Қазіргі тергеу органдары Тоғызбай Таж­­беновтің өлімі фактісі бойынша «Оны өлтіру» немесе «Өзін өзі өлтіруге дейін жеткізу» жөніндегі екі болжамды тексеруде. Сонымен қатар А.Минигулов пен С.Тембаевтың пышақ жарақаттарын алу фактісі бо­йынша да «Өлтіруге оқталу» болжамы тергелу үстінде.

Өткен аптаның жұма күні Тоғыз­бай Тажбеновтің жамбасы жерге тиді. Топырақ өзінің туған жері Же­з­­қаз­ғаннан бұйырды. Үлкен әулет­тен шыққан марқұмды жерлеуге жиылған адамның қарасы мол болды дейді қаралы шараға қатысқандар. Жез­қазғандағы әріптестеріміздің сөзі­не жүгінсек, марқұмның туған-туыс­та­ры, жалпы осы оқиғаға қатысы бар­лар­дың таныстары мен әріптестері бұл тақырып турасында бәлендей пікір айтудан бас тартуды жөн санайды екен. Бірақ тергеудің әділ және ашық болғанын қалайтындықтарын біл­дірген.

Ал пышақтан жараланған Аман­гел­ді Минигулов пен Сабыржан Тем­баев қолы шипа хирургтердің арқа­сында аман қалды. Әсіресе бас дирек­тор­дың жарақаты ауыр болған: оған күрделі ота жасалды. Оның әріптесі болса, ауруханада көп жатпай, үйіне қайтарылған.

«Бүгінгі күні тергеу бастапқы са­тыда болғандықтан, кім, кімге, қа­лай және қандай затпен дене жа­р­ақ­ат­та­рын келтіргені туралы түп­кі­лікті қорытынды жасауға әлі ерте екенін айта кету қажет. Оқи­ға­ға қатысушылардың әрқай­сы­сының рөлі кешенді жедел-тергеу іс-шараларынан кейін және сарапшылар қорытындыларының негізінде айқындалады», делінген облыстық прокуратураның ресми мәлімдемесінде.

Сонымен қатар прокуратура тұр­ғын­дардан дәлелденбеген дерек­тер­ді таратпай, тек ресми ақпаратты бас­шы­лыққа алуды өтінген және атал­ған қылмыстық істің тергелу барысы Қара­ғанды облысы прокурорының және облыстық полиция департаменті бас­шысының бақылауына алынғанын жет­кізген.

Болған істің ақ-қарасы айқын­дал­май­ынша, сырттан тон пішуден бойды аулақ салған біздің де прокуратура органдарының осы айтқанына алып қосарымыз жоқ. Тек, кабинеттегі кісі өліміне әкелген кикілжіңнің картинасы бар бояуымен толық және шынайы түрде ашылса екен деген тілек үстіндеміз.

Қарағанды облысы