Облыс орталығындағы «Ертіс – адалдық алаңы» жобалық кеңсесінің бастамасы бойынша Toraigyrov University студенттері «Арман әткеншектері» деп аталатын мультфильм түсірді. Елді жайлап бара жатқан сыбайлас жемқорлық індетіне қарсы түсірілген мультсериал жалғасады.
Аталған мультфильм оқиғасы Сарышұнақ бейнесіндегі қарапайым бір адамның жұмыс барысындағы кәдімгі қағазбастылықпен бетпе-бет кездесуімен басталады.
Сарышұнақ-кейіпкер балаларының арманын жүзеге асыру жолында түрлі кедергілерге тап болады. Оқиға желісінде қолдан жасалған тосқауылдар, қағазбастылық, шенеуніктердің әрекеттері көрсетіледі.
Сыбайлас жемқорлыққа қарсы күрес департаменті жанындағы «Ертіс – адалдық алаңы» жобалық кеңсесінің жетекшісі Ризабек Исабековтің айтуынша, өткен жылы алаң тұрмыстық сыбайлас жемқорлық деңгейін төмендетуге және өңір тұрғындарының осы қоғамдық кеселге қарсы пікірлерін қалыптастыруға бағытталған түрлі жобаларды жүзеге асырған.
– Ал мультфильм құрастыру – жобалық офистің идеясы. Бірлескен жұмыстың барысында студенттер өздерінің шығармашылық қабілеттерін көрсетті. Біз сценарийді жазып шықтық. Әрі қарай жастар жұмыс істеді, – дейді ол.
Қазір анимациялық фильмнің алғашқы бөлімін әлеуметтік желілер мен YouTube арқылы көрермендер көріп үлгерді.
Мультфильм бірнеше бөлімнен тұрады. Сарышұнақ кейіпкер болса, балалары үшін әткеншек орнатқысы келеді. Мультфильмнің «Арман әткеншектері» деп аталуы да осыдан.
– Енді жалғасын күтіңіздер! Әрі қарай Сарышұнақ бейнесіндегі әлгі адамның өмірінде қандай қиындықтар болатынын көресіздер, – дейді фильмді жасаушылар.
Павлодар облысы