2020 жылдың 15 ақпанынан бастап Қазақстан Республикасының Шекара қызметі Мемлекеттік шекараның жекелеген аумақтарында тірек бекеттерін орналастыру туралы шешім қабылдады. Тірек бекеттеріне қарауылдық иттерді қолдану «Қазақстан Республикасының Мемлекеттік шекарасы туралы» заңымен және мекемелік бұйрықтармен негізделген.
Шекарашыны итсіз елестету қиын. Шекарашы туралы кинолардың немесе шекара сақшыларына қойылған ескерткіштердің айнымас кейіпкері – ит. Иттің көмегімен шекарадағы есірткі, жарылғыш заттар тасымалы немесе шекарадан заңсыз өтуге талпыну сияқты кез келген құқық бұзушылық іс-әрекеттің жолы сенімді түрде кесіледі. Мысал келтіре кетсек, тек 2019 жылы ғана 34 заңсыз миграция каналының жолы кесіліп, 16 трансшекаралық қылмыстық топтың іс-әрекетіне тосқауыл қойылды. Бұлардың көпшілігі арнайы үйретілген қызметтік иттердің көмегімен жүзеге асырылды.
Тәжірибе көрсетіп отырғанындай, шекарашылардың итін ешқандай техникалық прогресс немесе шекарашының кәсіби қырағылығы да алмастыра алмайды. Ғылым иттердің көру, иіс сезу, есту анализаторларының адам мүмкіндіктерінен жүздеген есе артық жұмыс істейтіндіктерін әлдеқашан дәлелдеген.
Ескерте кетейік, шекарашылардың иттері шекарада өз бетімен қызмет етуге қажетті негізгі әдістерге, соның ішінде қарауылдық қызмет кезінде бейтаныс адамдарды ұстаудың агрессивті тәсілдеріне үйретілгендіктен жеке қауіпсіздіктері үшін азаматтардың шекара сызығына жақындамауына кеңес береміз.