Мемлекет басшысы Қасым-Жомарт Тоқаевтың бастамасымен қолға алынған «Волонтер жылына» орай Қызылорда қалалық жастар орталығы ребрендинг жасап, атауын жаңартып, қызмет аясын кеңейте түсті.
Бұдан былай «Qosyl» қалалық жастар ресурстық орталығы аталатын мекемеге арнайы келген қала әкімі Нұрлыбек Нәлібаевқа «Жас сарбаз» республикалық әскери-патриоттық қозғалысының облыстық ұйымы жетекшісі Айдос Қожамұратов рапорт беріп, клуб мүшелері қаруды бөлшектеп-жинаудан үйренген машықтарын көрсетті. Қазір қала мектептерінің 1500-ге жуық оқушысы осы ұйым мүшесі саналады.
«Qosyl» қалалық жастар ресурстық орталығының директоры Кеңшілік Сабыржан орталықтың жұмысы мен алдағы жоспары туралы айтты.
Волонтерлік бағыттағы жобалар қалада 5 жыл бұрын қолға алынған. Қазір 20-дан астам ұйым түрлі бағытта қызмет етіп келеді. Енді «Qosyl» солардың басын біріктіріп, жастардың бос уақытын тиімді ұйымдастыру, NEET санатындағылармен жұмысты күшейту, суицид пен құқық бұзушылықтың алдын алу, онлайн кеңес беру секілді бағыттар жандана түседі.
Қала басшысына «28 ілмек» волонтерлер клубының жетекшісі Әйгерім Нұрлан атқарып жатқан жұмыстарын таныстырды. Шала туған сәбилерге табиғи жүннен киім тоқитындар қатары жыл сайын артып келеді. Осыған дейін 1500-ден астам балаға тоқыма киім тарту еткен клуб мүшелері өндіріске қажетті материалды өздері сатып алып келіпті. Былтырдан бастап «Самұрық-Қазына» қорының грантын ұтып алып, шағын баспахана ашты. Енді содан түскен табысты осы істі жандандыруға жұмсап, қайырымдылық аясын кеңейте түспек.
Іс-шарада «Қызылорда – қайырымды жандар» волонтерлер тобының жұмысы да таныстырылды. Қазір «Әлем сізбен әдемі» жобасын қолға алған топ мүшелері оңалту орталықтары мен «Атамекен» балалар ауылы, «Аналар үйі», «Қарттар үйі» тұрғындары үшін сұлулық салондары қызметін тегін ұсынады. Ал «Озат» жобасы аясында көп балалы және әлеуметтік жағынан аз қамтылған отбасылар балалары түрлі үйірмелерге қатысады.
Кездесуде қала басшысы атаулы жылдағы бастамалар туралы баян етті. Биыл облыс орталығында 12 әлеуметтік жоба жүзеге асырылады. Қазір «Birgemiz» еріктілер корпусы» арнайы жобасы бастау алып, волонтер жастардың базасы құрылуда.
– Осы жылы еріктілік пен белсенділіктің үлгісін танытып жүрген жерлестеріміз арасында арнайы байқау жарияланады. Жыл көлемінде волонтерлер қозғалысына ерекше атсалысқан азаматтарды анықтап, еңбегіне алғыс ретінде шетелге саяхат жолдамасын табыстаймыз. Олар сол сапардан қала мәдениетін дамыту, қоршаған ортаны көркейту, көгалдандыру бағытында тың идеялар алып келеді деген ойдамыз және соны облыс орталығында жүзеге асыруына қолдау жасаймыз, – деді қала әкімі Нұрлыбек Нәлібаев.
Қызылорда