Бүгінде Нұр-Сұлтан қаласына шетелден келген отандастарымыздың арасында вирус жұқтыру ықтималдылығы жоғары және тапсырған сынамаларында вирус барлығы анықталған жандардың бірқатары елордадағы Көпсалалы медициналық орталық дәрігерлерінің үздіксіз бақылауында стационарда жатыр.
Клиника директоры Мұхтар Төлеутаевтың айтуынша, қазіргі уақытта вирус жұқтырған 28 адамның жағдайы қалыпты. «Күнделікті температура, қан қысымдары тексеріліп, дәрігерлер мен мейірбикелердің бақылауындағы жандарда клиникалық аурудың белгілері жоқ, тек тапсырған сынамаларынан вирус табылғаны болмаса», деген Мұхтар Есенжанұлынан орталықтың жұмысының жай-жапсарын сұрап білдік.
Халық «Жаман айтпай жақсы жоқ», «Қамданған қапы қалмайды» деп бекер ой толғамаса керек. Сондықтан жан-жақты қамданған орталықта бүгінде 60-тан астам дәрігер мен басқа медицина қызметкерлер күні-түні үйлеріне кетпестен орталықта төтенше жағдайдың қажеттілігіне орай жұмыс атқаруда. Вирустың адам өкпесіне тигізер зиянын, сондай уақытта өздігінен тыныс ала алмай қалатынын есепке ала отырып, қаладағы өзге клиникалардан оған қажетті аппараттар жеткізіліпті. Қазір аппараттар қолданысқа дайын. Сондай-ақ басқа емдеу мекемелерінен көмекке дәрігерлер келді. Ал емдеу шаралары Денсаулық сақтау министрлігінің халықаралық стандарттар негізінде бекіткен хаттамалары бойынша жүзеге асырылады, алайда сол хаттамаларды қолданбай-ақ аман өтсек дейміз, дейді дәрігерлер қауымы.
Күні бойына қорғаныш киімдерімен тұмшаланып еңбек ету оңай емес, бірақ бұл медицина қызметкерлерінің өздері үшін де, пациенттер мен карантинде жатқан 245 адам үшін де маңызды. Бақылаудағы адамдарды күніне бірнеше рет тексеру толықтай қорғаныш киімін киюмен ғана атқарылады. Бұл қауіпсіздік үшін қажетті қадам, ал мұндай киімдер жеткілікті. Көпсалалы орталық вирус деп қана отырған жоқ, жоспарлы жұмыстары да жүріп жатыр, ал індет ілмегіне іліккендерді қамтуға орталықта 387 орын бөлініпті.
Бұл вирус тұтас қоғам үшін сын болып отыр. Мені бұл індет айналып өтеді деп ешкім де кепілдік бере алмайды. Сондықтан әр адам жеке басының тазалығын сақтаумен қатар, көпшілік жиналатын жерден аулақ жүргені, қоғамдық орындарға бармағаны абзал. Ол біріншіден, өзін кеселден сақтағаны, екіншіден, маңайын, жақын-жуықтарын қорғағаны болып шықпақ, ал біздер дәрігерлер қолымыздан келгенді атқаруға тас-түйін дайынбыз. Бүгінде қан құрамында вирус бар адамдарда клиникалық белгілер болмағанына қарамастан, жағдайға жіті қарау міндетіміз, – дейді клиника басшысы бізбен әңгімесінде.