Орталық коммуникациялар қызметіндегі онлайн брифингте еліміздегі коронавирус жұқтырған науқастардың жағдайына тоқталған Денсаулық сақтау министрі Елжан Біртанов 28 медициналық қызметкердің ауру жұқтырып алғанын айтты.
Өткен жұмадағы жағдайға тоқталған еліміздің бас дәрігері карантин шаралары күшейтілген соң республика бойынша аурудың таралу деңгейі біршама төмендегенін атап өтті. «Дүние жүзінде коронавирус жағдайы нашарлап келе жатыр. Өткен тәулікте науқастардың саны 8,4 пайызға өсті, әлем бойынша бұл індеттен 53 мыңға жуық адам көз жұмған. Елімізде коронавирус жұқтыру бойынша барлығы 453 жағдай тіркелді. Оның ең көбі Нұр-Сұлтан (199) және Алматы (93) қалаларында. 29 адам емделіп, ауруханадан шығарылды. Қазір 11 науқастың жағдайы қиын. Олар интенсивті реанимация бөлімдерінде ем қабылдап жатыр. 68 пациенттің жағдайы орташа деңгейде, 341 пациенттің жағдайы жеңіл немесе симптомсыз науқастар. Осы науқастармен байланыста болған 13 467 адам анықталған. Олардың арасында 442 азамат шетелге шығып кетті. Қалған 13 025 азаматтың 96,7 пайызы табылып, стационарға және үйге оқшауланды. Бұл жұмыстар жалғасып жатыр. Өткен аптада науқастар санының көбеюі күн сайын 30-50 пайыз аралығында құбылып тұратын. Ел бойынша карантин шаралары күшейтілген соң, инфекцияның тарауы 9-12 пайызға дейін төмендеді. Бұл Үкімет пен өңір әкімдері жүргізген карантин шараларының тиімділігін көрсетеді», деді министр.
Төтенше жағдайға байланысты Мемлекеттік комиссия шешімімен Нұр-Сұлтан мен Алматыдағы жұмысты тоқтату тағы бір аптаға созылды. Министрдің айтуынша, бұл екінші апта еңбек ұжымдарындағы, қоғамдық орындардағы байланысты азайтып, инкубациялық кезеңде жүрген науқастарды анықтауға мүмкіндік береді. «Ауру жұқтыру жағдайларының 30 пайызы еңбек ұжымдарында тіркелгенін айтқан едік. Жұмыс орындары инфекцияның таралуына айтарлықтай ықпал етті. 28 наурыздан бастап Нұр-Сұлтанда науқастар өсімі күніне 60 жағдайдан 15 жағдайға дейін төмендеді. Алматыда 8-ден 2 жағдайға дейін азайды. Мұның барлығы карантин мен оқшауланудың тиімді болуынан», деді ол.
Мемлекеттік комиссия эпидемияға қарсы және санитарлық стандарттарды мүлтіксіз орындау, медициналық ұйымдарды мақсатты қолдану және карантиндік және провизорлық стационарлардағы медициналық қызметкерлерді карантиндік жағдайға ауыстыру туралы шешім қабылдады. Министрдің айтуынша, науқастармен байланыста болған медициналық мамандар бұл нысандарға келмеуі тиіс. «Дәрігерлерге тиісті тұрмыстық жағдай жасалуы керек. Бірқатар өңір бұл жұмысты белсенді түрде бастап кетті. Менің ойымша, медициналық мамандардың мәселелері шешіліп, күдігі сейіледі. Түсінеміз, көптеген маман аурудан қауіптеніп, үйлеріне барғысы келмейді. Сондықтан бұл шешімге толық негіз бар», деген министр облыс әкімдері эпидемия кезіндегі жұмыста дәрігерлерге қонақүй мен жатақхана тауып, көлікпен және тамақпен қамтамасыз етіп жатқанын жеткізді.
Бірақ соған қарамастан 28 медициналық қызметкердің ауру жұқтырғанын айтқан Елжан Біртанов вирус жұқтыру қаупі жоғары орындарда жұмыс істеп жүрген мамандардың статистикасы жүргізілетінін жеткізді. Сондай-ақ өз туыстарынан да ауру жұқтырған медициналық мамандардың бар екенін айтқан министр: «Барлық жағдайда да вирус табылған жұмыс орындарында санитарлық-эпидемиялық тексеру жүргізіледі. Медициналық немесе басқа да еңбек ұжымдары карантинге жіберіледі. Әрине науқастар емделіп жатқан ғимараттарда қауіп басым. Сондықтан ондағы медициналық қызметкерлерге ерекше көңіл бөлеміз. Олар да өзге науқастар секілді инфекциялық ауруханаға жатқызылып, ем алады», деді.
Қазақстан Дүниежүзілік денсаулық сақтау ұйымымен бірлесіп, аурудың тиімді терапиясын іріктеу бойынша жаһандық медициналық зерттеуге қатыса бастағанын жеткізген Денсаулық сақтау министрі елордада республикалық интенсивті терапия орталығының ашылғанын хабарлады. «Науқастардың көбі – 50-ден асқан кісілер. Оларға дұрыс ем ұйымдастыру үшін осы аптада Нұр-Сұлтан қаласында инфекциялық стационарда республикалық интенсивті терапия орталығын аштық. Бұл Ұлттық кардиохирургия орталығының басшысы Юрий Пяның және оның әріптестерінің қолдауымен және қатысуымен ашылды. Онда осы орталықтың дәрігерлері, реаниматологтар, перфузиолог және басқа да мамандар осы орталықта жұмыс істеуді бастады. Жағдайы өте ауыр науқастар бас қалаға жеткізіліп, емделетін болады. Бірақ Алматыдағы Инфекциялық ауруханада медициналық көмек өте жоғары деңгейде ұйымдастырылған. Кейбір науқастар қиын жағдайдан өтіп, беті бері қарады. Әр науқас бойынша видео конференция арқылы республикалық консилиум өтеді. Онда біздің ең білікті мамандар тікелей қатысып, қажетті шаралар енгізеді. Оның барлығы менің бақылауымда», деді Е.Біртанов.
Сондай-ақ министр Мемлекеттік комиссияның шешімімен Нұр-Сұлтан, Алматы және Шымкент сынды үш қалада мобильдік тез құрылатын ауруханалардың құрылысы басталғанын атап өтті. «Нұр-Сұлтан қаласында бірінші деңгейде 200-250 төсек орындық аурухананың құрылысы басталды. Себебі қазіргі біздің жоспар бойынша 2 мыңға жуық науқасқа арналған инфекциялық төсек орын қажет. Ал қазір елорда ауруханаларында 800 инфекциялық төсек орын бар, бос орындар жеткілікті. Бірақ біз болашақты да болжауымыз керек. Соңғы апталарда жергілікті деңгейде бос басқа медициналық ұйымдарды пайдаланып жүрміз. Бірақ жоғары деңгейдегі халықаралық стандартқа сай ем көрсету үшін арнайы медициналық ұйым қажет. Сондықтан осы шешімге келдік. Ал бұл ауруханалардың ішінде қажетті санитарлық дезинфекциялық режім болатындықтан оның маңындағы тұрғындарға қауіп жоқ», деген министр шикізат шетелден келетіндіктен құрылыстың оңайға соқпайтынын да атап өтті.