Xiaomi компаниясының бірнеше фанаты Лэй Цзюнь мырзаның айфон ұстайтынын біліп қалып, айқай-шу шығаруда, деп хабарлайды Gizmochina порталы. Xiaomi бас директорының әлеуметтік желіде жариялаған посты Apple компаниясының гаджетінен жазылғаны көрініп қалған.
Қытайдағы Twitter аналогы Weibo әлеуметтік желісінде Лэй Цзюнь тұрақты түрде оқырмандармен тілдесіп отырады екен. Өзінің кезекті постында қандай кітаптар оқу керектігі жайында айтқан қытайлық алпауыт компания басшысының басы пәлеге қалды десе де болады. Ол пост дәл сол мезетте бәсекелес компанияның смартфонынан жазылғаны көрініп қалған.
Мұндай шатақ жағдай бұрындары Samsung компаниясына да қатысты болған еді. Енді міне, қытайлықтар осындай жағдайды әлеуметтік желіде қызу талқылауда. Өз компаниясының өнімін менсінбеу нағыз барып тұрған сорақылық деген сарында пікірлер де айтылуда.
Бірақ Лэй Цзюньды қорғаушылар да табылып жатыр. Соның бірі танымал аналитик әрі Xiaomi компаниясының инвестициялық әріптесі Пан Цзютан бәсекелес компания өнімінің сапасы мен өзгерістерін тексеру үшін оның гаджетін ұстағанда тұрған ештеңе жоқ дейді. Бұл қайта өз құрылғыларын жетілдіру үшін аса қажет дүние екен.
Бір қызығы Xiaomi негізін салушы адам былтырлары өз қарамағындағы мамандарға басқа компаниялардың гаджеттерін пайдалануға тыйым салғанын айтқан еді. Енді өзі осындай оқыс жағдайға тап болып отыр.
Аузы күйген бас директор ендігі посттарын флагмандық смартфон Xiaomi Mi 10 Pro арқылы жазуда.
Серікқазы КӨКЕНАЙ,
журналист