Бүгіннен бастап бүлдіршіндер «Balapannyń» YouTube каналынан шетелдік мультсериалдарды қазақ тілінде көре алады.
«Qazaqstan» телерадиокорпорациясына қарасты «Balapan» телеарнасы үздік шетелдік мультхикаялардың телеқұқығымен қоса, интернет құқықтарын сатып алу бастамасын алғаш болып жүзеге асырып отыр. Яғни алдағы уақытта арнадан көрсетілетін шетелдік анимациялық жобалар YouTube желісіндегі «BalapanTV» арнасына салынады. Айта кету керек, бұған дейін шетелдік жобалардың дубляждалған нұсқасын әлеуметтік желілерге салу құқығы еліміздегі ешбір арнада болмаған.
Ұлттық арнаның хабарлауынша, осы күнге дейін бүлдіршіндеріміз әлемнің озық мультфильмдерін YouTube платформасынан басқа тілдерде көріп келсе, енді ана тілімізде тамашалау мүмкіндігіне қол жеткізіп отыр. Бұл – қазақ тілінің дамуына ықпал ететін әрі интернет желісіндегі қазақ тіліндегі сапалы контентінің көбеюіне серпін беретін маңызды бастама. Бүгінде телеарнаның You tube-тегі жазылушыларының саны бір миллионға жуықтаған.
1 маусым – Халықаралық балаларды қорғау күніне орай, бүлдіршіндерге тарту ретінде YouTube-тағы «BalapanTV» каналына «Құрастырушы Лева» мультсериалының 66 бөлімі салынды. Алдағы уақытта YouTube-арна «Виспер-1», «Виспер-2», «100% Wolf», «Аңдар достығы», «Капитан Шарки», «Кунг-фу қоян: от әміршісі», «Қанат қақ», «Аяз атаны құтқару», «Кемедегі оқиға» сынды анимациялық жобалармен толықтырылмақ.