Алматыда Әл-Фараби даңғылы бойында (Меңдіқұлов пен Достық көшелерінің арасында) «Алматы – адалдық алаңы» аясында «Өз еліңді бұзба» муралы салынды. Бұл композиция азаматтарды адамгершілікке тәрбиелеуге, адалдық, әділеттілік қағидаларын сіңіруге арналған.
Муралдың тұсаукесеріне Сыбайлас жемқорлыққа қарсы іс-қимыл агенттігінің төрағасы Алик Шпекбаев қатысты. Ол: «Жұмысты алдын алуға және парасаттылық жүйесін ілгерілетуге, адал және парасатты ұрпақ тәрбиелеуге, халықпен тұрақты кері байланыс орнатуға бағыттау керек. Азаматтарды тыңдап, оған құлақ асып, кез келген мәселеге жедел ден қою қажет», деп жобаның маңыздылығын атап өтті.
«Мұндай іс-шаралар халықтың санасын өзгертуге, сыбайлас жемқорлыққа қарсы мәдениетті қалыптастыруға, адамгершілігі мол ұрпақ тәрбиелеуге арналған», деді қалалық Сыбайлас жемқорлыққа қарсы іс-қимыл департаментінің басшысы Нығмеджан Сапаров.
Әр қазақстандықтың құқық бұзушылық пен сыбайлас жемқорлыққа қарсы іс-қимыл аясында өзінің белсенділігін танытуы елдегі жағдайды жақсартуға мүмкіндік беретіні сөзсіз.