Алматы қаласы өңірлік коммуникациялар қызметінің алаңында қалалық Қоғамдық денсаулық сақтау басқармасының басшысы Камалжан Надыров мегаполистегі эпидемиологиялық жағдай туралы жан-жақты баяндады.
Өткен аптада ауруханаларға жатқызу мен жедел жәрдем қызметіне жүгіну екі есе артқан болатын. Науқастар санының өсуі – қант диабеті, жүректің ишемиялық аурулары, артериалды гипертензия сияқты аурулары бар пациенттердің көбеюімен байланысты деген қорытындыға келіп отырмыз. Сондай-ақ аурудың ауырлығы мен пациенттердің жас арасындағы байланыс анық байқалады, яғни, жағдайы ауыр және өте ауыр пациенттердің 80%-дан астамын 60 жастан асқандар құрайды.
– Алматыда эпидемиологиялық жағдай күрделі, бірақ басқаруға болады. Қазір стационарлар мен алғашқы санитарлық-медициналық көмек көрсету ұйымдарында медициналық көмекті ұйымдастыру жұмыстары толық жүргізіліп жатыр. Бастапқыда қаладағы жұқпалы ауруларға арналған кереует саны екі ауруханада 500 орыннан аспайтын. Қазір төрт есеге көбейіп, шамамен 2 мың кереуетті құрайды, болашақта 7 есеге көбейеді. Төсек-орындардың ұлғаюы басқа клиникаларды қайта құру жолымен, жаңа ауруханалардың ашылуымен, сондай-ақ «Халық Арена» және «Алматы Арена» спорттық базаларында ауруханалар ашу арқылы қамтамасыз етіледі. Бұл кешендер инфекциялық қауіпсіздік талаптарына ең қолайлы болғандықтан таңдалды. Атап айтқанда, таза және лас аумақтардың ағынын қарастыратын ішкі аумақта секциялық бөлініс бар. Тағы бір маңызды артықшылығы – бір уақытта 500 немесе одан да көп пациентті орналастыруға болады, бұл адам ресурстарын ұтымды пайдалану тұрғысынан өте маңызды. Себебі кадрлардың жетіспеушілігімен бір уақытта әртүрлі ұйымдарды медициналық кадрлармен қамтамасыз ету қиынға соғады, – деді Қоғамдық денсаулық сақтау басқармасының басшысы.
Бас дәрігер жұқпалы аурулар емдеу стационарларында 236 дәрігер, 610 орта медициналық қызметкер, 393 кіші медициналық қызметкер тиісті медициналық көмек көрсетіп жатқанын мәлімдеді. Провизорлы стационарларда 86 дәрігер, 216 орта медициналық қызметкер, 158 кіші медициналық қызметкер саналып отыр. Жалпы, Алматыда стационарлық деңгейде КВИ жұқтырған науқастарды емдеу үшін 1700-ге жуық адам қызмет атқарып отыр.
– Әкімдік тарапынан дәрігерлердің ауысымнан кейін демалуға, жұмыс орнына барлық жағдай жасалып жатыр. Әріптестеріміздің қауіпсіздік мәселелеріне ерекше назар аударылады. Инфекцияның жаңа толқынына дайын болу мәселесіне келсек, біз дәрігерлердің, орта және кіші қызметкерлердің қосымша топтарын құрдық. Еріктілер мен резидент дәрігерлерді тарту бойынша жұмыс жүргізілуде, – дейді К.Надыров.
Қандай пациенттер ауруханаларға жатқызылады?
Госпитализацияға COVID-19 індеті расталған, дене қызуы 3 күннен бері 38,5°С болса, қанның оттегімен қанығуы 95 пайызды кұраса, сондай-ақ өкпеде 25 пайыздан астам өзгерістердің басым пневмония белгілері бар (КТ нәтижелері бар) пациенттер жатқызылады. 65 жастан асқан созылмалы аурулары бар науқастар мен гемодиализ ем-дом шараларын қажет ететін иммун тапшылығы белгіленген науқастар да ауруханаға ем қабылдау үшін жатқызылады.
Әрбір емханада бекітілген регламентке сәйкес пациенттерді бақылау, мониторинг жүргізу жұмыстарымен айналысатын 72 мобильдік бригада құрылған. Мобильдік топтың құрамына – бөлімше меңгерушілері, инфекционист дәрігерлер, эпидемиологтар, учаскелік дәрігерлер мен мейірбикелер кіреді. Барлығы 287 алғашқы санитарлы-медициналық көмек көрсету қызметкері жұмылдырылған. Жұмыс сапасын арттыру мақсатында аталған бригадалардың санын арттыру бойынша жұмыстар жүргізіп отырмыз. Маусым айыннан бастап емхана бақылауында 19 мыңнан астам жақын байланыста болған адамдар бар.
– Білуімізше, КВИ-дің қауіпті және жиі асқынуларының бірі – пневмония. Жағдайдың ауырлығын бағалау үшін уақтылы өкпенің компьютерлі томографиясын жүргізу қажет. Осыған байланысты, біз КТ қызмет көрсетушілерінің тізімін жасадық, емханалар КТ орындайтын мемлекеттік және жекеменшік ұйымдармен шарттар жасасты. Қала бойынша аталған қызмет көрсетушілер саны – 12. КТ қызметін жеткізушілер коронавирустық инфекция диагнозы расталған пациенттерді қабылдау жұмыстарының бөлек, кестесін және ауру белгілері ұқсас пациенттерге арналған жеке уақытты анықтады. Осылайша, біз КТ кабинеттерінің өткізу қабілетін талдап, індет жұқтырғандардың қазіргі легіне сәйкес, Алматыда халықты КТ-мен қамтамасыз етуде проблема болмауы тиіс деген қорытындыға келдік. Сондай-ақ үш ай ішінде КТ аппаратын Қалалық балалар қалалық клиникалық жұқпалы аурулар ауруханасы және медициналық жедел жәрдем көрсету ауруханасына жеткізу күтілуде, бұл осы зерттеуге қолжетімділікті арттырады, – деді басқарма басшысы.
Қаладағы зертханалық диагностика жағдайына келсек, бірқатар зертханалардың істен шығуы қоғамда белгілі бір резонанс тудырғаны белгілі. Бірақ, пациенттерде тест нәтижесінің теріс болуына қарамастан, коронавирусқа ұқсас клиникалық көрініс тапқан жағдайда, біз диагностикалау мен емдеудің жаңа клиникалық хаттамасына сәйкес, тестілеу нәтижесін күтпестен емдеуді бастаймыз. Бұл емдеу процесін бақылауға және процесті қауіпті асқынуларға дейін өршітіп алмауға мүмкіндік береді. Болашақта осындай келеңсіз жағдайларды болдырмау үшін жекеменшік жеткізушілерді тарту арқылы ағымдағы қуатты арттыру және жаңа зертханалар ашу сияқты мәселелер шешіліп жатыр, – дейді Алматының бас дәрігері.
АЛМАТЫ