Еңбек және халықты әлеуметтік қорғау министрінің бұйрығына сәйкес 31,9 мың азаматтың мүгедектік мерзімі автоматты түрде 3 айға ұзартылды. Бұл туралы Egemen.kz министрліктің баспасөз қызметіне сілтеме жасап хабарлайды.
Сонымен бірге, бұрын белгіленген мүгедектік тобы үшін мемлекеттік жәрдемақыларды төлеу ағымдағы жылдың 17 шілдесінде жүзеге асырылды.
Сонымен қатар, 9 мыңнан астам қазақстандық eGov.kz порталы арқылы онлайн режимде мүгедектікті рәсімдеді немесе ұзартты. Бұл мүмкіндік автоматты түрде ұзартумен қатар, мемлекеттік мекемелерде адамдардың көп жиналуын болдырмау және коронавирустық инфекцияны жұқтыру қаупін азайту мақсатында мүгедектігі бар адамдарға берілді. СOVID-19 таралуына байланысты шектеу шараларының қолданылуының барлық кезеңі бойы азаматтар мүгедектікті белгілеу және куәландырудан қайта өту үшін электрондық форматта өтініш бере алады.
Өтініш беру үшін eGov.kz порталында авторлану қажет және электрондық цифрлық қолтаңба (бұдан әрі – ЭЦҚ) болуға тиіс.
Порталға кіргеннен кейін жоғарғы оң жақ бұрышында ашылмалы тізім бар батырманы басып, "Электрондық өтініштер" және "Қызметке онлайн тапсырыс беру" дегенді таңдау қажет.
Содан кейін өтініш беруші өзінің жеке кабинетіне кіреді, ол жерде "Құру" түймесін басу керек. Содан кейін сіз жолдарды толтыруыңыз керек ("өңір", "нақты тұратын мекенжайы", "ұялы телефон" және т.б.). "Алушы" жолында "Еңбек, әлеуметтік қорғау және көші-қон комитетінің аумақтық департаменті" тармағын таңдаңыз. Бұдан басқа, құжаттардың фотоға түсірілген немесе сканерленген көшірмелерін қоса беру қажет. Тізімді "Қажетті құжаттар тізімі" сілтемесіне өту арқылы көруге болады.
Соңғы әрекет ЭЦҚ-кілттің көмегімен өтінімге қол қою болады. Ол үшін "Сертификатты таңдау» батырмасын басу және атауы "RSA..." - дан басталатын файлды таңдау қажет, содан кейін жүйе ашық парольді енгізуді талап етеді.
Өтініш беру нәтижесінде өтінімге жеке кабинетте статус беріледі.
EGov.kz порталы арқылы мүгедектікті белгілеуге өтініш беру мүмкіндігі қазақстандықтар үшін төтенше жағдайды енгізу кезінде алғаш рет пайда болды. Ағымдағы жылдың наурыз айынан шілде айына дейін осы тәсілмен 9 699 азаматқа мүгедектік белгіленген.
Естеріңізге сала кетейік, бұған дейінгі Үкімет отырысында Қазақстан Республикасының Премьер-Министрі Асқар Мамин қайта куәландыру мерзімі карантин кезеңіне түспа-тұс келетін мүгедектік мерзімін автоматты түрде ұзарту процесін жеделдетуді тапсырған болатын.