Қамқорлықты қажет ететін білім алушыларға көмек көрсетуді көздейтін «Оқушыны қолда» республикалық қайырымдылық акциясы басталды. Бұл туралы Президент жанындағы Орталық коммуникациялар қызметінде өткен брифингте айтылды.
Іс-шарада сөз алған Балалардың құқықтарын қорғау комитетінің төрағасы Есенғазы Нұртөлеуұлы аталған акция Білім және ғылым министрлігінің «Атамекен» ұлттық кәсіпкерлер палатасы жанындағы «Менің атамекенім» қоғамдық бірлестігімен бірлесіп қолға алынғанын жеткізді.
«Бұл акция меценаттар, волонтерлердің көмегімен қолдау мен демеуге аса мұқтаж оқушыларды қашықтан оқуға қажетті техникалық құралдармен, сондай-ақ жоғары жылдамдықтағы интернетпен қамтамасыз етуге бағытталған. Біз барлық қазақстандықтарды, кәсіпорындар мен ұйымдарды, компанияларды акцияға белсене қатысуға, балалардың қашықтан қиындықсыз оқуына көмектесуге шақырамыз. Министрлікте ең алдымен көмекке аса мұқтаж білім алушылардың тізімі жасалды, олардың қатарына бірінші жетім балалар және жағдайы төмен отбасылардағы оқушылар енгізілді. Сонымен қатар акция аясында өтінім беру үшін арнайы «qoldau.edu.kz» сайты ашылды», деді Е.Нұртөлеуұлы. Комитет басшысының баяндауына қарағанда, тізім бойынша техникаларды таратуда атаулы әлеуметтік көмек алып отырған, көпбалалы отбасыдан шыққан, ата-анасы мүгедек және жалғызілікті ата-анасы бар балаларға да басымдық беріледі. Өтінім берушілер мен көмек қолын созғысы келетін қайырымды жандар туындаған сұрақтары болса, Балалардың құқықтарын қорғау комитетінің телеграм чаты және комитеттің басқа да әлеуметтік желілердегі парақшалары, оқушының өз мектебі арқылы мамандармен байланысып жауап ала алады.
Ал «Менің атамекенім» қоғамдық бірлестігінің атқарушы директоры Ләззат Алтынбекқызы акцияны жүзеге асыруда қолданылатын сайтты аталған бірлестіктің тегін жасағанын айтты. «Біз qoldau.edu.kz сайтын мүмкіндігінше жеңіл қолдануға ыңғайлап жасадық. Онда бір батырмадан соң екіншісін басудың немесе алғашқы санаттан келесісіне өтіп отырудың қажеті жоқ. Барлығы бір бетте анық көрініп тұр. Порталда қазірдің өзінде министрлік растап берген жеке компьютері жоқ 20 мыңнан аса оқушының тізімі бар», деді Л.Алтынбекқызы.
Арнайы тізім енгізілген сайтта көмекке мұқтаж білім алушылар «жетім балалар, ата-ананың қамқорлығынсыз қалған балалар және әлеуметтік аз қамтылған отбасылардың балалары» деп үш санатқа жіктелген. Бұдан бөлек ауыл балаларына арнап 4-санат та қосылыпты. Ата-аналар білім алушының жеке сәйкестендіру нөміріндегі соңғы 3 цифрды теріп, баласының енгізілген-енгізілмегенін анықтай алады.
«Егер балаңызды тізімнен таппасаңыз, уайымдамаңыз. Бұл – бар болғаны бірінші кезең. Көмекке аса мұқтаж білім алушыларды техникамен қамтамасыз етіп болғаннан кейін екінші кезеңді бастаймыз. Осы ауқымды істі жедел жүргізу – сіз бен біздің қолымызда. Кәсіпкерлер қауымы, сонымен бірге жеке тұлғалар да сайтымыз арқылы төлемді оңай әрі тез жасай алады», деді «Менің атамекенім» қоғамдық бірлестігінің атқарушы директоры.