Заңғар таулардың алыстаған сайын биіктей беретіні секілді, жылдар жылжып, уақыт ағыны сырғыған сайын қазақ санасында Шәмші Қалдаяқовтың аяулы есімі биіктей бермек. Ән болып жаралған Шәмші саналы ғұмырында тұтас даланы әнмен әлдиледі. Халықтың ішінде жүріп, туған еліне деген ақ адал махаббатын әнмен әдіптеді. Шәмші әлемі сезім дейтін тылсымды иірімге салып, өзіне қарай тарта беретін қуатты күш. Оның әні қазақ мәдениетінің сарқылмас қазынасына, інжу-маржан мұрасына айналғалы қашан. Тума таланттың қай туындысы болмасын өмірдің өзінен алынған. Сезіміңді толқытпауы, көңіліңді тербемеуі, жүрегіңді елжіретпеуі мүмкін емес.
Шәмші әнімен тәрбиеленген қаншама буын махаббат пен сағыныштың, ізгілік пен мейірімнің құдіретін саз арқылы бойына сіңірді.
Айтулы ақындарымыздың қуатты жырлары Шәмші әнімен жымдасқанда, ән мен жыр бір-бірімен жарасып-жамырасып тұла бойды шымырлатар таңғажайып туындыға айналды. Шәмші әні талай орындаушының жұлдызын жарқыратып, халықтың жүрегіне жол ашты. Қаншама өскінді өнер әлеміне іңкәр етті.
Күні бүгінге дейін кез келген думанды кештер мен қуаныш дастарқандарының төрінде Шәмшінің әні шырқалады. Болашақта да солай болатыны айқын. Сұлу сазды серік еткен композиторларымыз үшін айнымас үлгі, жол сілтейтін темірқазық болып Шәмші ағамыз тұр.
Қазақтың қай топырағына барсаң да Шәмші аға шалқыған шалқар ән болып алдыңнан шығады. Жас та, кәрі де оның әнін сүйіп айтады. Арыстың жағасы мен Каспийдің толқыны ән болып кеудеңді шымшылайды, бақыт құшағына тартады, Сыр сұлуы болып жаныңды шуаққа бөлейді. Бір сөзбен айтқанда, оның шығармалары мәңгілік мұра, оның әні жүректердің дауасы.
Осынау мерейтойға орай, алдағы уақытта өзім еңбек етіп жүрген Жамбыл атындағы мемлекеттік филармонияның ұжымы жақсы жобаларды жүзеге асыруды көздеп отыр. Басқа да өнер ұжымдары Шәмші әндеріне арналған түрлі онлайн концерттер өткізіп жатыр. Мұның бәрі халықтың ұлы дарын иесіне деген шексіз құрметі.
Нұрғали НҮСІПЖАНОВ,
Қазақстанның халық әртісі,
Мемлекеттік сыйлықтың лауреаты