Материк бойынша миллионға жуық адамда коронавирус инфекциясы расталды. Сарапшылар вирустық инфекцияның екінші толқыны басталғанын айтады.
14 ақпанда Африка құрлығы бойынша алғашқы жағдай тіркелгелі аймақта 25 143 адам вирустан қайтыс болып, шамамен 700 000 кісі емделіп шыққан. ДДСҰ аймақтағы жағдайдың ауыр екенін айтып, дабыл қақты. Сарапшылар вирус жұқтыру дерегі ресми статистикаға қарағанда әлдеқайда көп деген пікірде.
Көрсеткіштің жартысы Оңтүстік Африка елдерінде тіркелген. Науқастар саны бойынша Оңтүстік Африка көш басында. Елде 11 556 вирус дерегі анықталған. Одан кейін Мысыр, Нигерия, Гана, Алжир, Морокко, Судан мен Кения тұр.
Алайда ДДСҰ-ның Африка бойынша жауапты маманы Мэри Стивен Al-Jazeera басылымына берген сұхбатында «Африкадағы эпидемия жағдайы шегіне жетпеді» деген пікір айтты. Маманның айтуынша, бірнеше мемлекет карантин режімін жеңілдеткеннен кейін вирус жұқтыру жағдайы күрт көбейген. «Дегенмен вирус жұқтырған миллион адамның 80 пайызы 10 елдің азаматтары», дейді ол.
Нақты дерекке назар салсақ, әлемнің 54 елінде тараған вирус 21 млн-нан астам кісіден анықталды. Онымен қоймай жаһандық экономика мен мемлекеттердің денсаулық сақтау жүйесіне әсер етті. Ал Африкадағы жағдайдың мүшкіл болуына тест пен ақпаратқа қолжетімсіздік себеп дейді мамандар. Өйткені 58 млн халқы бар Оңтүстік Африкада тек 10 млн адамға сынама жасалған. Ал 17 000 науқас тіркелген Камерунда 25 млн халықтың 1 пайызы ғана тексеруден өткен.
БҰҰ соңғы жағдай аймақты қаржылық дағдарысқа алып келуі мүмкін деген болжам айтады. ДДСҰ өкілі Мэри Стивен жағдайды түзеу үшін 2014 жылғы эбола эпидемиясын назарға алу керек екенін, соған сай қабылданған шаралар аймақтағы ахуалды жеңілдете алатынын айтты.