Қазақстандық әнші Данэлия Төлешова America’s Got Talent шоуының жартылай финалына жолдама алды, - деп хабарлайды Egemen.kz.
Танымал әлемдік шоудың ширек финалы тікелей эфирде өтті. Жартылай финалистерді таңдау NBC сайтындағы көрермендердің дауыстарына тікелей байланысты болды. Дауысты тек АҚШ-тағы азаматтар ғана бере алды. Сондай-ақ бірнеше қатысушы қазылар алқасының мүшелерінен қосымша балл жинады.
"Лос-Анджелесте қазір менімен бірге анам мен мұғалімім Наталья Александровна бар. Біз өнер көрсетер алдында қатты қобалжыдық. Сапарға шығар алдында өте көп жүктеме болды. Мен қосымша академиялық педагог Гүлзат Даурбаевамен вокал бойынша дайындалып, кішкене ауырып қалдым. Оның барлығы қазір артта қалды. Қазіргі сәттегі сезімімді айтып жеткізу қиын. Барлықтарыңызға қолдауларыңыз үшін рахмет. Бұл шоуда қандай керемет атмосфера бар! Мұнда ерекше шабыттанып, тағы бір жаңа нәрсе жасауға ұмтыласың. Келесі турға бұрынғыша күн сайын дайындалатын боламын!"- деді Данэлия Төлешова.
Бүгін шоу қатысушыларын баспасөз мәслихаты мен АҚШ-тың журналистерімен сұхбат күтіп тұр. Ширек финалда жас әнші Harry Styles Sign Of The Times әнін орындады. Көрермендер мен қазылар алқасы бұл жолы да Данэлияның өнеріне алғашқы кезеңдегідей ерекше сүйсініп, өз орындарынан тұрып қол шапалақтады.
Данелия анасымен және мұғалімімен АҚШ-қа бірнеше күн бұрын ұшып келген. Олар шоудың барлық қатысушылары үшін міндетті шарт - карантиндік шараларды қатаң сақтап жатқанын айтады.
"Біз ұшар алдында коронавирусқа тест тапсырдық. Ұшып келгеннен кейін барлық басқа қатысушылар сияқты міндетті карантин күндерін өткізіп, тағы да тест тапсырдық. Барлығының дансаулық жағдайы жақсы. Біз қауіпсіздік шараларын сақтаймыз, тіпті, қонақүйдегі тамақтану да қызметкерлермен байланыс болмас үшін есікке дейін ғана жеткізіледі", - деді Данэлияның мұғалімі Наталья Чуракова.
America ' s Got Talent жартылай финалының күні мен қазақстандық орындаушының келесі композициясы туралы әзірге мәлімет жоқ.
Қазақстандағы және әлемдегі соңғы жаңалықтарды бірінші болып оқу үшін Telegram желісінде бізге жазылыңыз.