Жаңа оқу жылы қарсаңында «Назарбаев зияткерлік мектептері» дербес білім беру ұйымының өкілдері NIS ұжымының атынан Түркістан облысындағы су тасқынынан зардап шеккен екі ауылдың оқушыларына сыйлықтар табыстады. Оның ішінде 719 мектеп формасының жиынтығы, 36 ноутбук, балаларға арналған көркем әдебиеттер мен педагогтерге арналған әдістемелік әдебиеттер бар.
Өргебас ауылында алғашқылардың бірі болып жаңа мектеп формасын алған Жанар Мамрежепова. Ол сыныптастарымен бірге еліміздің барлық балалары білім алуды армандайтын Назарбаев зияткерлік мектептері жүйесінің қолдауын мақтан тұтатынын жеткізіп, ұстаздары мен ата-аналардың алдында бала арманымен бөлісті, келешекте педагог болғысы келетінін айтты.
Түркістан облысының Мақтаарал ауданындағы су тасқынынан кейін Назарбаев зияткерлік мектептері жүйесінің ұжымы зардап шеккендерге көмек көрсету қорына қаражат аударған болатын. Қайырымдылық науқанына барлық зияткерлік мектептердің ұстаздары мен қызметкерлері, төрт бірдей орталық – педагогикалық шеберлік, педагогикалық өлшеулер, ақпараттық технологиялар, сондай-ақ орталық аппарат үлес қосты. Екі ауылға атаулы көмек көрсету туралы шешім қабылданып, Өргебас ауылындағы Қ.Аманжолов атындағы орта мектептің және Жеңіс ауылындағы Қ.Мүсірепов атындағы орта мектептің оқушыларына қол ұшын созды. Су тасқынынан кейін екі мектептің де ғимараттары қатты зардап шеккен еді. Қазір Өргебас ауылында күрделі жөндеу жұмыстары әлі де жалғасуда, ал Жеңіс ауылының оқушылары қашықтан оқыту жүйесі аяқталған соң жаңа ғимаратта білім алмақ.
Санитарлық-эпидемиялық жағдайға байланысты сыйлықтарды табыстау бірнеше ұстаздар мен оқушының, сондай-ақ ата-аналар комитетінің өкілдерінің қатысуымен шағын ортада өтті.
Мақтаарал ауданының әкімі Бақыт Асанов Назарбаев зияткерлік мектептерінің жүйесі балаларға атаулы қолдау көрсету арқылы қуанышқа бөлегенін айтты:
– Мектеп формасы, компьютерлік техника жиынтығы, көркем және әдістемелік әдебиеттер – білім беру саласында жаңа оқу жылы қарсаңындағы ең маңызды көмек, – деді аудан басшысы.
Ал Шымкент қаласы химия-биология бағытындағы Назарбаев зияткерлік мектебінің директоры Балқан Қасымовтың айтуынша, шалбарлар, пенжактар, жейделер, жәкеттер, кеудешелер – барлық мектеп формасы отандық тауарөндірушілерді қолдау мақсатында шымкенттік «SABTEX» ЖШС-да тапсырыспен тігілді. Өргебас ауылындағы орта мектептің директоры Дәуренбек Әбдіғали балаларға арналған ноутбуктар мен мұғалімдерге арналған әдістемелік әдебиеттерге ризашылығын білдіріп, мамырдағы су тасқыны өңір үшін сынақ болғанымен тұрғындар елмен бірге екенін жете түсіне түскенін жеткізді.
Айта кетелік, кездесуге келген Өргебас ауылындағы орта меткепте алты баласы білім алатын көпбалалы ана Айман Батырбекованың тұңғышы жаңа оқу жылында мектепті тәмамдағалы отырса, кенжесі бірінші сыныпқа барады екен.
– Еліміздің түкпір-түкпірінен сан мыңдаған бейтаныс адам біз үшін қам жеп, балаларымыз бен немерелеріміздің оқуына ең қажет сыйлықтар дайындады. Қуанышымда шек жоқ, – дейді Қ.Мүсірепов атындағы орта мектептің оқушысы Рүстем Жандостың әжесі Сәрсенкүл Ақтөреева.
Жиында «Назарбаев зияткерлік мектептері» дербес білім беру ұйымының басқарма төрайымы Күләш Шәмшидинова осыншама қиындықтырға қарамастан еліміз білім беру саласына қолдау көрсетіп жатқан кезде өмірдің өз арнасымен жалғасатынын айрықша атап өтті.
– Біз балалардың оқуға шабыттанып, мектепке асыққандарына, ата-аналардың балалары мен немерелерінің білім алуын бағалайтындарына куә болып қайттық. Өргебас және Жеңіс ауылдарындағы мектептермен ынтымақтастықты қолдауды жалғастыратын боламыз, – деді Күләш Ноғатайқызы.
Түркістан облысы