Облыс көлемінде "Құқық тәртібі" іс-шара өткізу барысында облыстық Полиция департаменті және орман шаруашылығы және жануарлар дүниесі аумақтық инспекциясының қызметкерлері 26 тамыз күні түнгі уақытта Қармақшы ауданы, ІІІ-Интернационал ауылына қарасты егістік алқабында күдік тудырған екі шетел автокөлігін тоқтатады, деп хабарлады Egemen.kz
Тексеру барысында көліктегі 4 азаматтың заңсыз аңшылық жасап жүргендігі анықталды, олар Қармақшы ауданы, ІІІ Интернационал ауылының тұрғындары болып шықты.
Оқиға орында автокөліктерден еш құжатсыз тіркеуде жоқ 3 аңшы мылтығы және атылған жабайы шошқа заттай дәлелдеме ретінде алынды. Автокөліктер айыппұл алаңына қойылды.
Қазіргі таңда, бұл дерек бойынша Қазақстан Республикасы Қылмыстық кодексінің 337 бабымен сотқа дейінгі тергеп – тексеру амалдары жүргізілуде. Сараптамалар тағайындалып, оқиғаның мән-жайы анықталуда.
Одан бөлек, аталған дерекке қатысты Қазақстан Республикасы Әкімшілік құқық бұзушылықтар туралы кодексінің 482 бабы аясында бойынша әкімшілік іс қозғалды.