Елдің рухын көтеріп, мәдени мәртебесін жоғарылатып, бүгінгідей аласапыран уақытта сеніміне серпін беретін бірден-бір күш әдебиет десек, әсіре сілтегендік болмас. Ән мен күй, өлең мен жыр өркениетті халқымыздың өне бойына өгей дүние емес, қарасөзге қанаттанып, табиғи өнер иесін көрсек талаптанып кететініміз содан шығар. Індет іргемізге із сала бастағанда, дәрігерлерге рух беріп, дәрменсіздікке салынбауға шақырған қаншама жыр жазылды, қаншама ән жарыққа шықты. Сайып келгенде, соның барлығы әдебиет арқылы елдің еңсесін көтеріп, үкілі үмітін үзбеуге үндеді.
Сөзімізге тұздық болардай, күні кеше осындай игі жаңалықтың шетін естіп қуанып қалған жайымыз бар. Ол – Павлодар облысында үш бірдей ақынның кітабы жарық көруі еді. Дәлірек айтсақ, Айбек Оралханның «Алты аңғар» атты алғашқы жыр жинағы мен Алпысбай Әбділұлының «Әріпті соттау» атты кітаптары Жазушылар одағы Павлодар облыстық филиалының арнайы жобасы аясында және «Жомарт жүрек» сыйлығының иегері, өнер жанашыры Асылбек Туғанбайдың қаржылай қолдау көрсетуімен жарық көрген.
«Бүгінгі жаңалық осы. Айбек пен Алпысбайдың көптен күткен алғашқы кітаптары жарыққа шықты. Кітаптарды шығаруға демеушілік көрсеткен Асылбек Туғанбай ағамызға алғысымыз зор. Бұйырса, Ертіс-Баян өңірінің әдеби өмірінде таяу күндері тағы да бірқатар айтулы жаңалық болатындығын сүйіншілей кеткім келеді. Керекуде көркемсөздің салқар көшіне ілескен талантты тұстастарымыздың қатары көбеюде. Бұл көзіқарақты оқырманды ерекше қуантады. Олардың алды алғашқы жинақтарын шығарып та үлгерді. Осы бір үрдіс үздіксіз жалғасса, өңірдің әдеби өмірі жандана түсері сөзсіз», дейді ақын, Жазушылар одағы Павлодар облыстық филиалының директоры Жарқынбек Амантай.
Ал үшінші кітаптың иесі – айтыскер ақын, «Алтын домбыра» иегері Аспанбек Шұғатаев. Ол кітабына «Жердегі Аспан сөйлесе...» деп ат қойыпты. Автордың айтуынша, кітапқа айтыстары мен өлеңдері енген.