Өскемендегі 5 мың жұмысшысы бар «Бипэк Авто – Азия Авто» зауытының ұжымы әділдік іздеп, конституциялық құқықтарының қорғалуын сұрап, петиция әзірлеп жатыр.
Өтініш мәтінінде «Ұзақ уақыт бойы мүдделі тұлғалар тобы Өскемен қаласындағы Қазақстанның алғашқы автомобиль зауыты «Азия Автоны» толық шектеуге бағытталған жоспарлы жұмыстарын жалғастыруда. Конвейердің жұмысын тоқтатуға және республикадағы автомобиль жасау саласын дамыту жөніндегі холдингтің барлық инвестициялық бағдарламасын тоқтатып қоюға мәжбүрлейтін сот шешімдеріне дейін пайдалануда» деп жазылған.
Арызданушылар алда-жалда «Азия авто» зауыты жұмысын тоқтатса, мыңдаған адам жұмыссыз қалатынын да алға тартып отыр. Сондай-ақ Президентке бағытталған хатта алпауыт компания кез келген дәрежедегі тексерулерге дайын екенін де атап көрсеткен. Қарапайым халықтың көбін отандық темір тұлпармен қамтып отырған көлік зауыттарының жетістіктері де жоқ емес. Аталған компания көлденең кедергілерге қарамастан, 2020 жылдың бірінші жартыжылдығында еліміздің автомобиль нарығының «абсолютті көшбасшысы» статусын сақтап қалған. Салық төлеуде де бұл зауытта ешқандай мәселе туындамаған көрінеді.
Бірақ Индустрия және инфрақұрылымдық даму министрлігі «Азия Авто» АҚ және «Азия Авто Қазақстан» АҚ кәсіпорындары келісім міндеттемелерін орындамағанын, ал өзге кәсіпорындар шанақты балқытып біріктіру және бояу бойынша технологиялық жабдықтарды іске қосу жөніндегі міндеттемелерін келісімнің жоспар-кестесіне сай орындағанын хабарлаған болатын.
Алайда «Бипэк Авто – Азия Авто» баспасөз қызметінің мәліметіне сүйенсек, өнеркәсіптік құрастыру бойынша келісімді тоқтатуға бүгінгі таңда заңды негіз жоқ. Шанақты дәнекерлеу мен бояудың қуатын күшейтуді қолданысқа енгізу жөнінде міндеттерді орындау мерзімі қосымша келісіммен 2020 жылдың 31 желтоқсанына дейін ұзартылған.
Бұл мәселе компания қызметкерлерін ғана емес, шығысқазақстандықтарды да алаңдатып отырғаны рас. Бірі басқа автомобиль сату орталықтары бағаны күрт көтеріп жіберуі мүмкін десе, енді бірі шекарадан шетелдік көлік қолжетімді бағамен кіре бастайды деп болжайды. Ал экономика саласы мамандарының пікірінше, «Азия Авто» компаниясының жұмысы тоқтаса, қарапайым халық үшін тиімсіз болуы мүмкін.
– Қазіргі таңда отандық автокөлік өнеркәсібіне мемлекет қолдау көрсетуі керек деп ойлаймын. Отандық өнімнің қай-қайсысы болсын халыққа тиімді бағамен ұсынылады. Сол сияқты отандық автокөлік те халық үшін қолжетімді. Ал басқа орталықтардағы көлік класы жоғары болғанымен, бағасы орта жалақы алып отырған тұрғындар үшін тиімсіз, – дейді менеджмент саласының Ph.D докторы Ақмарал Тұрсынбекқызы.
Мерей ҚАЙНАРҰЛЫ,
журналист
ӨСКЕМЕН