Бұл туралы облыстық полиция департаментінің баспасөз қызметі мәлім етті.
«23-30 тамызда аралығында «Таза Қазақстан» жедел-алдын алу іс-шарасы өткізіліп жатыр. Мақсат – табиғат қорғау заңдылығын бұзғандарды анықтау. Құрманғазы аудандық полиция бөлімі мен аудандық орман шаруашылығы және жануарлар дүниесі инспекциясы бірлесе өткізген рейд кезінде Қиғаш өзенінде «Ямаха» маркалы моторы бар «Бударка» қайығы тексерілді. Оны Приморск ауылдық округінің тұрғыны жүргізіп келе жатқан. Полицейлер қайықтағы алты жолаушыдан Қызыл кітапқа енген 8 лотосгүлін тапты. Туристер Атыраудан Құрманғазы ауданына гүлденген лотосты тамашалау үшін арнайы келген. Тәртіп бұзушылар жазаланады», – деп хабарлады облыстық полиция департаментінің баспасөз қызметі.
Лотос гүлі еліміздің өзге өңірінде кездеспейді. Сирек кездесетін бұл гүл Құрманғазы ауданындағы Қиғаш пенШора өзендерінде өседі. Гүл өскен аумақ 5 мың гектарды құрайды.