АСТАНА ТЕАТРЫ АЛМАТЫЛЫҚ КӨРЕРМЕН ТАЛҒАМЫНАН ШЫҒАР МА ЕКЕН?

Өнер мен мәдениеттің ошағы болған Алматы шаһарына әлемнің айтулы тұлғаларынан бастап, түрлі өнер ұжымдары гастрольге келіп жатады. Театр қойылымдарына кенде болып көрмеген қалаға сәуірдің 20-25 аралығында елорда­дан Қ.Қуанышбаев атындағы сазды драма театры гастроль­дік сапармен келмек. Алматы тұрғындары мен қонақтары бұл жолы Астана театрының алты спектаклін көреді. – Қ.Қуанышбаев атындағы қазақ музыкалық драма театры араға бес жыл салып, Алматыға гастроль­дік сапарын жоспарлап отыр. Бұл бастамаға Астана қала­лық әкімдігі қай жағынан болса да қолдау көрсе­тіп, қаржылық демеу­ші­лік танытпақ. Бұл сапар оңтүстік астанадағы театр сын­шылары, майталман дарынды дра­матургтер, өнерді түсінетін жұрт­­­­шы­лық алдын­дағы есепті са­пары­­­мыз болмақ. Қазір біздің театр­да үш бірдей маман қоюшы-режиссер жұмыс істейді, – дейді аталмыш театрдың көркемдік жетекшісі әрі директоры Еркін Жуасбек. Әзірбайжан Мәмбетов мектебі­нің үрдісін жалғастырып отырған елордадағы іргелі өнер ордасы Ал­матыдағы өнер апталығын режис­сер Әлімбек Оразбектің “Абай” (М.Әуезов) трагедиясымен ашпақ. Сол сияқты Павлодар қаласын­дағы Ж.Аймауытов атындағы қазақ сазды драма театрының көркемдік жетекшісі Ерсайын Тәпенов өткен жылы Астана театрында А.Цагаре­ли­дің “Гамарджоба” деген атпен музыкалық комедиясын сахналаған болатын. Осы аталмыш туынды да  алма­тылық көрермендермен қауышатын болады. Көрермендер жіберіп алмауға тиісті тағы бір тамаша мүмкіндік – кезінде Әзірбайжан Мәмбетов сахналаған “Қарагөз” трагедиясы. Бұл қойылым өткен жылы Тегеран қаласында өткен гастрольдік сапарда ирандықтардың жоғары бағасына ие болғанын өнерсүйер театр қауым ұмыта қоймаған болар. Алматылық көрермендерге осы­дан екі жыл бұрын Астана театры­ның режиссері Юрий Ханинга-Бекназар Қазақстанның халық әртісі Гүлжан Әспетованың мерей­тойына орай сахналаған “Қымбат­ты Па­мелла” (Дж.Патрик) коме­дия­сын тама­шалау­дың да сәті түсіп тұр. Сол сияқты осы апталық ая­сын­да бала­лар­ға арналған М.Ах­манов­тың “Ал­дардың айласы” ертегісі ұсынылады. Өткен жылы Қарағандыда өткен республикалық театр фести­валінің жүлдегері атанған режиссер Н.Жұ­ма­ния­зовтың “Үй­лену” коме­диясы (Е.Жуасбек) мен режиссер Болат Ұзақов сахналаған жас драматург Қ.Жүнісовтің “Махаббат мелодрама­сы” атты психологиялық туындысы қазір Астана жастары мен қонақтары ең көп баратын қойылымдар қатарында. Осыншама өнер жауһары өз аяғымен Алматыға келіп тұрғанда  өнерді қадір­­лейтін халайық мұндай мүмкіндікті уыстан шығара қой­масы анық. Әйтпесе, елорданың мәдени тыны­сын арнайы тамаша­лауға барсаңыз да, алты бірдей спектакльді қатарынан көріп шығу неғайбыл. Ал Қ.Қуанышбаев атындағы қазақ музыкалық драма театрының директоры Еркін Жуасбек Алматы­дағы М.Әуезов атындағы Қазақ мемлекеттік академиялық драма театрының директоры Есмұқан Обаев­қа дән риза. Өйткені, өнер­дегі бәсекелес деп емес, үзеңгі қағысқан әріптестер ретінде Астана театрын лайықты қарсы алуға әкемтеатр да аз дайындалып, аз қобалжып жатпаған көрінеді. – Біз үшін бұл гастрольдің маңызы жоғары. Театр қойылым­дарынан кенде болып көрмеген ал­ма­тылық көрермендердің шы­найы ықыласына бөленіп, жақсы баға алып жатсақ, жаңа бір белеске көтеріл­геніміз. Астанадағы қазақ музыкалық драма театры жас болса да, қатарында елге талантымен танылған, тәжірибе жинақтаған сах­на саңлақтары аз емес. Қуандық Қыс­тықбаев, Ержан Нұрымбет, Сы­рым Қашқабаев, Нүркен Өтеуі­лов, Тілектес Мейрамов, Ләйлә Бек­назар, Гүлжан Әспетова, Рым­кеш Омархановалардың ойыны ешкімді бей-жай қалдырмас, – дейді Еркін Жуасбек. Айнаш ЕСАЛИ, Алматы.