Сиқырлы сазы салқар даланы тұтас тербеген көрнекті сазгер Нұрғиса Тілендиев шығармалары халқының мәңгілік мұрасына айналғалы қашан. Ұлы композитордың 95 жылдығына орай жас домбырашылар мен әншілер арасында ұйымдастырылған «Әлқисса» байқауы мәреге жетті.
Байқау қорытындысы Мәдениет және спорт министрлігінің ұйытқы болуымен әсем фестивальға ұласып, көзі тірісінде Нұрғиса Атабайұлының өзі құрған «Отырар сазы» оркестрі дарын иесінің ең танымал композицияларын әуелете орындады.
Бір айға созылған республикалық ән мен күй сайысына қатысуға ниет білдірген жастардың дені кәсіби музыканттар. Сондықтан да бақ сынаған өнерпаздардың арасынан кіл мықтыны анықтау оңайға соқпаған. Қазылар алқасының шешімімен Тілендиев шығармаларын нақышына келтіре орындағандар бір турдан келесі турға жолдама алып отырған. Фестиваль аясындағы барлық іс-шаралар онлайн форматта өткендіктен қатысушылар өз өнерлерін бейнебаян түрінде паш етті.
Қазылар алқасының шешімі бойынша, «Домбыра» аталымындағы 1-орын Дастан Қазкеновтің, 2-орын Ерасыл Ринатов пен Арсен Тұрсыновтың, ал жүлделі үшінші орын Рауан Жексембі мен Ертіс Сайырхан есімді жас күйшілердің еншісіне бұйырды.
«Вокал» аталымында Гүлдана Алдадосова мен Әйгерім Алтынбек топ жарса, екінші орынға Төлеген Рахымбаев, Дінмұхамед Көшкінбаевтар ие болды. Айтулы байқаудың үшінші тұғырынан көрінген қос өнерпаз Әсем Әубакірова мен Сымбат Тасбергенова көпшіліктің ықыласына бөленді. Сондай-ақ Тілендиевтер отбасы тағайындаған арнайы сыйлық Нұрдәулет Сағатбекке табысталды.
Ән мен күйдің айдыны шалқыған додаға Қазақстанның еңбек сіңірген әртісі Жексембек Нұржауов, Қазақстанның еңбек сіңірген қайраткерлері Ермұрат Үсенов, Жәмила Баспақова, Дина Хамзина, Дінзухра Тілендиева сынды өнер майталмандары қазылық етті.
Жеңімпаздардың қатысуымен өткен гала-концертті көрермендер Жамбыл атындағы Қазақ мемлекеттік филармониясының You Tube арнасынан тамашалады.
– Біз бұл фестивальге ұзақ уақыт дайындалдық. Бастапқыда Республика сарайында, Опера театрында өткіземіз деп ойлаған едік. Бірақ пандемияға байланысты онлай форматта өткізуге тура келді. Вокал мен домбыра аталымдары бойынша ұйымдастырылған байқау жоғары деңгейде салтанат құрды деп айта аламыз. Ал қорытынды концерттік бағдарламада әкемнің халыққа кеңінен танымал емес туындыларын көбірек орындауға тырыстық. Әрине, танымал туындылары да шырқалды, – дейді «Отырар сазы» оркестрінің бас дирижері Дінзухра Тілендиева.
Айтулы байқау өскелең ұрпақты композитордың шығармашылығымен сусындату, ұлттық музыкалық мұраға деген ынталарын ояту мақсатында қолға алынғанын айтқан Жамбыл атындағы Мемлекеттік филармонияның баспасөз хатшысы Манар Алиева, жыл соңына дейін өнер ұжымы Тілендиев мұрасына арналған бірнеше жобаны жүзеге асыруды жоспарлап отырғанын жеткізді.
АЛМАТЫ