Біз өзі қызықпыз. Большевиктердің мүсінін тұғырынан түсіре алмаймыз, қазақтың қаймақтарын тұғырға қондыра алмаймыз. Семейде руханият жанашырлары әнші-компазитор Тұрсынғазы Рахимовтың дайын тұрған мүсініне орын таппай жүр.
Арқалығына Тарбағатайдың тау-тасы бейнеленген орындықта домбырасын қолына алып, Тұрсынғазы Рахимов отыр. Жүзінен нұр төгілетіндей. Келісті мүсін 2018 жылы мәдениет қайраткері Адай Азаматовтың тапсырысымен жасалған. Алайда әнші-сазгердің мүсініне Алаш арыстарының ізі қалған Семей шаһарынан лайықты орын табылмай тұр.
– Екі жыл бұрын қала әкіміне хат жаздық. Қор аштық. Тұрсынғазы Рахимовтың атын көшеге бердік. Ендігі ұсынысымыз, Жамақаев көшесінің бойына өнер аллеясын ашсақ дейміз. Аллеяға өнер адамдарының шағын бюстерін қойсақ деген де ой бар. Бірақ әкімдіктегілер коронавирусты сылтауратып үнсіз қалды, – дейді руханият жанашыры Адай Азаматов.
Ал Семей қаласы әкімінің орынбасары Айдар Садырбаевтың айтуынша, мүсін жеке тапсырыспен жасалғандықтан орын әлі белгіленген жоқ. Оны арнайы комиссия қарауы керек екен.
Комиссия уақыт бөліп қашан қарайтыны, бізге беймәлім. Әр көшесі тарихтан сыр шертетін шежірелі шаһардан сазгердің мүсініне көрнекті орын табу жылға созылатындай қиын шаруа емес сияқты.
Тұрсынғазы Рахимовтың шығармашылығы қазақтың ән өнерін жаңа деңгейге көтерді. «Сәби болғым келеді» әнімен танылған сазгер көбінесе Мұқағали Мақатаевтың өлеңдеріне ән жазған. «Дариға, домбырамды берші маған», «Отыздан асып барамын», «Мен сені сағынғанда», «Санаулы күн», «Нені аңсаймын», «Я, жаратушы Аллам», «Қазағым-ай», «Аягөз ару» сынды әндері бүкіл қазақ даласын тебіренткен.
Келесі жылы Тұрсынғазы Рахимовтың туғанына 70 жыл. Атаулы датаға орай әнші-сазгердің замандасы Адай Азаматов халықаралық деңгейде үлкен байқау ұйымдастыруды ойластырып отыр. Оған дейін қала әкімінің орынбасары айтқан комиссия бас қосып, ақылдасып, қазақ даласында әні әуелеген сазгердің дайын мүсінін көрнекті орынға қояды деп сенейік.
Семей