Елорда жастары белсенді

Жыл санап елордадағы волонтерлер саны да көбейіп ке­леді. Жағдайы қиын жандарға қолұшын созып, көмегін аямай­тын жастардың қатары қалың екен­дігі қуантады.  «Астана жас­тарының» өзінде 2,5 мың­нан ас­там ерікті бар. Олар во­лон­терліктің бір реттік шара емес, күнделікті өмірдің біріне  айнал­ғанын айтады.

«Бүкіл әлемде еріктілер қыз­метіне ерекше назар ауда­ры­лады. Шетелдік ЖОО-ға оқу­ға­ түсу кезінде волонтерлік тә­жі­ри­­бе­нің артықшылығы бар. Бас­қаларға көмектесуге дайын, қамқор азаматтарымыздың көп екеніне қуаныштымын», дейді волонтер Мирас Мұратов. Ол бұл қызметте қариялардың ба­та­сын алу ең үлкен құрмет еке­нін жеткізді. «Өзім қа­тысқан алғашқы үлкен шарада бізді бір күштің біріктіргенін сездім. Ол бірлік еді. Қыста және көктем кел­генде жеке тұрғын үйлердің аумағын қар мен мұздан тазарту үшін қыздар мен ұлдар болып көмекке жиі баратынбыз. Көбіне көмекке жалғызбасты қарттар мұқ­таж. Топтың ең кішісі болған соң үнемі үйлердің шатырын қардан та­зартуға мені жіберетін. Кейбір әжелер бізді естен шы­ғармай, қар таза­лағаннан кейін шайға шақырады. Мен үшін волонтерліктен алатын ең құн­ды нәрсе – адамдардың шынайы алғысы», дейді Мирас.

«Астана жастары» волонтер­лерді қатарына қабылдамастан бұрын оларды арнайы мектепте оқытады. Биыл 300-ге жуық во­лонт­ерді оқытуды жоспарлап отыр екен. Ұйымда волонтер бол­ғы­сы келетіндер үш кезеңнен тұра­тын оқудан өтуі керек. «Алдымен бастапқы дайындық курсынан өтеді. Онда алғашқы медициналық кө­мек көрсетуді үйретеді, түрлі психологиялық тренингтер де бар», дейді Нұр-Сұлтан әкімдігінің «Ас­тана жастары» басшысы Шыңғыс Тілеулин.

Бастапқы дайындық шама­мен он сабақтан тұрады. Одан кейін мамандандыру курсы өтеді. Волонтерлер бағыт­тар­ға бөлінеді. «Төтенше жағдай­лардағы көмекке қатыс­қысы келетіндер мамандармен бірге даярлықтан өтіп, оқу-жаттығу жиындарына барады. Сонымен қатар халықаралық еріктілер мен әлеуметтік еріктілерге ар­нал­ған тренингтер өткізіледі. Әрі қарай тікелей акциялар кезінде практикалық сабақтар болады», деді «Астана жас­тарының» басшысы.

Ұйымда 2014 жылдан бастап 2 мыңнан астам волонтер даярлықтан өтіпті. Олар Арыс қаласын қалпына келтіруге көмектесті, пандемия ке­зінде мұқтаждарға көмек көр­сетіп, маскалар таратты және бұған дейін Қазақстанның астанасында өткен халықаралық іс-шараларға да белсене қатысқан.

Жақында қалалық волонтерлер штабы Алматы ауда­ны әкімдігімен бірлесе отырып, аудандағы 50 қарт­қа әлеу­меттік көмек көрсеткен. Жал­пы, егде жастағы тұрғын­дарға кө­мек беру – елордалық жас­тардың жылдағы дәстүрі. Қыркүйек-қазан айларында да көмекке мұқтаж жандардың ауласын, үй-ішін тазалап, 30-ға жуығына арнайы азық-түлік себеті жеткізіледі. Ал ардагерлерге қандай көмек қажет екені туралы ақпаратты аудандық Ардагерлер кеңесі беріп отырады.

«Жыл басынан бері жүз­ден астам қарттың ауласын қоқыс­тан тазартып, үй-ша­руа­сына көмектесу, азық-түлік алып келу секілді жұ­мыс­­тарды атқарып келеміз. Же­ңіс­тің 75 жылдығына арнап арда­герлердің ауласында Мем­лекеттік академиялық филар­мониясымен бірге шағын кон­церттік бағдарлама да ұсын­дық. Тұрмысқа қажетті әлеу­­мет­тік се­беттер де таратылды. Қор­­ға­ныс министрлігімен бірі­гіп, тыл арда­герлеріне ме­даль­­дарын табыс етумен де айна­лыстық. Себебі карантин кезін­де қарттардың сырт­қа шығуы қауіпті еді. Сонымен қа­тар дәрі-дәрмектер мен ви­рус­тан қор­ғану құралдарын жеткізіп бердік», дейді Нұр-Сұлтан қалалық Жастар саясаты басқармасының бөлім басшысы Ақұлан Тастемір.

Бүгінге дейін аз қамтылған 150-ден астам қартқа азық-түлік себеті табысталған. Көмек қажет ететін егде жастағы азаматтар 109 IКomek орталығына өтініш берсе де болады.