Қазіргі уақытта коронавирус тудырған пандемия Жер шарын алқымнан алып тұрғандай. 38 миллионнан астам адамға жұғып, қай елдің де экономикалық жағдайына кері әсерін тигізген індеттің екінші толқыны келсе, қандай қадамдар жасалуы тиіс? Осы тұрғыда Нұр-Сұлтан қалалық қоғамдық денсаулық сақтау басқармасының басшысы Тимур Мұратов елордадағы №10 қалалық емханаға барып, нысанның дайындығын тексерді.
Басқарма басшысы айтқандай, бүгінде бас қалада эпидемиялық ахуал тұрақты. Стационарларда 87 науқас ем қабылдаса, амбулаторлық жағдайда 60 науқас медицина қызметкерлерінің бақылауында тұр. Олардың кейбірінде ауру белгілері білінбеген. Нұр-Сұлтанда жағдай тұрақты болғанымен, ауру өршіп тұрған солтүстік көршіге жапсарлас жатқан Солтүстік Қазақстан облысының бірнеше ауданында олай болмай тұр. Сондықтан да өзгермелі дүниеде қамсыз отырмай, алдын ала дайындалған жөн. Елордадағы барлық емханада фильтр кабинеттері іске қосылған. Оның негізгі міндеті – ЖРВИ жұқтырған науқастарды анықтап, оларды оқшаулап, науқастарды ПТР тестен өткізу.
– Вирус анықталған жағдайда амбулаторлық бақылау және емдеу жүргізіледі. Біздің басты мақсатымыз – науқасты пневмония сияқты ауыр жағдайға түсірмеу, – деген басқарма басшысы пациенттердің өзге адамдармен байланысын азайту үшін үйге барып қызмет көрсетілетінін де жеткізді. – Барлық науқас базаға енгізіледі. Егер олардың бірінен коронавирус анықталса, олармен байланыста болған адамдар назарда болады. Олардың үйіне барып, ПТР тестілеуден өткізуіміз мүмкін. Бұл үшін мобильді бригадалар құрылды. Ал фильтр-кабинетке тек белгілі бір себептермен емханаға бара алмайтындар келеді», деді ол.
Сондай-ақ Т.Мұратов елордадағы емдеу мекемелерінің екінші толқынға дайын екенін айтты. Бірақ бұл ауру жұқтырғандардың санына байланысты болатыны түсінікті. Егер қала тұрғындары мен меймандары әлеуметтік арақашықтықты сақтап, бетперде тақпаса, науқастардың саны артады. Қазір қаланың денсаулық сақтау жүйесі 5 600 орынмен және 434 ӨЖТ аппараттарымен және басқа да жабдықпен қамтуға қауқарлы. Алайда сақтықты ұстанып, азаматтар өз денсаулығы мен маңайын аурудан сақтаймын деп қорғанатын болса, сырқаттар саны бұған жетпеуі де мүмкін.
– Біз ауру санын өсіруге жол бермеуіміз керек. Әр азамат ауырмас үшін барын салып, жауапкершілікпен келсе, барлық тиісті ережені сақтаса, екінші толқынның бізді айналып өтуі мүмкін, – дейді ол.
Бүгінде COVID-19 сақтық қамын ұғынып, карантин қатаң сақталған елдерде ғана белең алмай тұр. Оған алыста емес, елімізбен шекаралас Қытай еліндегі ахуал дәлел.
«Біздің емханада екі кіру тобы бар. Балаларға және ересектерге бөлек есіктер қарастырылып, оның әрқайсысына тепловизорлар қойылды. Кіре берісте адамның қызуы өлшенеді. Егер қызу анықталса, олар бірден фильтрге жөнелтіледі. Сол сияқты фильтрде де 3 бағыт бойынша қызмет көрсетіледі», дейді №10 қалалық емхананың директоры Гүлнар Алпысбекова.
86 мың адамға қызмет көрсететін емханада үш түрлі, яғни балаларға, ересектерге және аяғы ауыр әйелдерге арналған кабинеттер қарастырылған екен. Оған қоса ПТР зерттеу жүргізуге арналған биоматериал жинайтын қосымша тағы бір бөлме бар. Пациенттер саны өссе, тағы екі кабинет ашылмақ, ал қазір оған қажеттілік жоқ. Емхана басшысының айтуынша, қаладағы әр амбулаторлық-емханалық ұйымдарда құрылған мобильді бригадалар осында да жұмыс істейді. Бригадалар ауру жұқтырған науқастарды бақылауда ұстайды, норматив бойынша әрбір мобильді бригада 5 мың тұрғынға көмек көрсетеді. Бүгінде емханада 17 мобильді топ құрылған. Бұдан бөлек оттегі консентраттары, қосымша пульсоксиметрлер сатып алынды. Дәрі-дәрмекпен толық қамтамасыз етілген. Қазір емханаға күніне 40-қа жуық адам жүгінеді. Оның 20-сы ересек адам болса, 20-сы – бала.