Апта басында Алматыдағы Кардиология және ішкі аурулар ғылыми-зерттеу институтында инновациялық технологияларды пайдалана отырып, жүрек ырғағының күрделі бұзылыстарын катетерлік емдеу бойынша екі күрделі операция жасалды. Алдағы уақытта мұндай оталар талай адамның өмірін ұзартатын болады.
Аталған институттағы сәтімен жасалған операция инновациялық технологияларды пайдаланудағы шеберлік дәрісімен ұштастырылды.
Zero-Fluro технологияларын (флюроскопиясыз) пайдалана отырып, жүрек ырғағының күрделі бұзылысы кезінде катетерлік аблация жүргізу үшін MiFi инновациялық көпполярлы аблациялық катетері Кардиология және ішкі аурулар ҒЗИ тәжірибесінде тұңғыш рет қолданылды. Операциялар сәтті өтті. Осы катетерді қолдану арқылы тағы бірнеше күрделі ота жасау жоспарланған.
Жас мамандар мен резиденттердің қатысуымен өткен шеберлік сағатында клиниканың жүрек ырғағы және өткізгіштігінің бұзылысы бөлімшесінің меңгерушісі, еліміздің жетекші аритмологтарының бірі Роин Реквава екі пациентке операция жасады. Науқастардың бірі 55 жастағы ер адам 5 жыл бұрын миокард инфарктіне шалдыққан, 2 жыл бұрын жүрегіне шунттау жасалған. Пациентті ентігу, әлсіздік, бас айналу, жүрек соғуы мазалап, ұдайы дәрі қабылдағанымен, көмегі шамалы болған. Екінші ота 42 жастағы әйел адамға жасалды.
Роин Роинович аритмогендік ошақтардың радиожиілікті аблациясы аритмияны емдеудің танымал әдістерінің қатарына жататынын атап өтті. Ол жүрек ырғағының бұзылысы жағдайындағы катетерлік аблация қауіпсіздігінің өзекті мәселелерінің бірі асқынулардың күшею қаупі болғандықтан, олардың дамуы көріністі қалыптастыру технологиясы, хирургтің тәжірибесі секілді бірнеше факторларға байланысты екенін айтты.
Аблацияны жүргізудің уақытын азайту және тінге әсер етудің нақтылығын қамтамасыз ету осы асқынулардың қаупін төмендете алады. Сондықтан аритмиялық ошақтардың нақты сәйкестенуі мен көрінуі маңызды. Осы ошақтардың сәйкестенуінен кейін пациенттің аритмиядан арылуы үшін нақты аблация орындалуы мүмкін.
Осы технология рентген сәулелерінің пациенттің ағзасына әсер етуін мейлінше азайтуға, тіпті жоюына мүмкіндік береді.
Навигациялық жүйе көпполярлы катетерлердің көмегімен аблациялық катетер орналасқан жерді көрсетеді және катетермен нысаналы учаскеге қол жеткізуге мүмкіндік береді. Сонымен қатар аблация процедурасының өзін жеңілдетеді. Институтты ссындай MiFi технологиясы бар (IntellaTip MiFi) катетермен Boston Scientific компаниясы қамтамасыз етті. Ұшындағы микроэлектродтардағы сигналы оның орналасуын және әрекет ету саласын анықтауға мүмкіндік береді де, асқыну қаупін азайтады.
«Сондай-ақ микроэлектродтар әсер етудің нәтижелілігі туралы нақты ақпаратты алуға мүмкіндік береді, осылайша аритмияны емдеудің тиімділігін арттырады және рецидивтердің жиілігін азайтады. IntellaTip MiFi пайдаланған кезде аблация процедурасының 100%-ға дейінгі жоғары тиімділігі байқалады», дейді Р.Реквава.
Институтта жылына 900-ден аса осындай операция жасалатынын атап өткен жөн. Радиожиілікті абляция жасау кезінде, одан кейін де өлім-жітім болған жоқ. КІАҒЗИ-да ота жасалған ең үлкен науқас 94 жаста болды.
АЛМАТЫ