Мобильді қосымшадағы қолайсыз жағдай

Қазанның 28-і күні таңер­тең­нен бастап аталған қосым­шадан ауытқулар байқалып, іле-шала оның қызметі уа­қы­т­ша қолжетімсіз болды. Банк клиенттерінің есеп­шо­тын­­дағы қаржысының дұ­рыс көрсетілмеуі түрлі алып­қашпа әң­гімеге жетеледі. Бірінің қар­жысы кеміп, тіпті минусқа кіріп кетсе, енді бірі есебінің есе­­­леніп кеткенін айтып жатты.

Банк қосымшасындағы бұл бей-берекет кибершабуылдың кесірінен болды деп бағам­да­ғандар да көп кездесті. Әлеу­меттік желіде хакерлердің клиент­­тердің картасынан 79 млн теңге тонағаны туралы хабар тарады. Алайда көп ұзамай банк өкілдері мұндай фактіні жоқ­­қа шығарып, техникалық ақау болғанын, клиенттердің ақша­сы сақталатынын мәлім­деді.

«28 қазан күні Kaspi.kz қосымшасында техникалық ақау туындады. Нәтижесінде, клиенттердің шоттарындағы қаржы көлемін қате көрсетуде. Өкінішке қарай, картамен төлем жасау, банкоматтардан ақша шешу, толықтыру, тө­лем­­дер мен аударымдар уа­қытша қолжетімсіз. Ком­па­­ния бар­лығын тез арада қа­лыпқа кел­тіру үшін жұмыс іс­теуде. Әлеу­меттік желілер мен мессенджер­лерде мұның ки­бершабуыл екені тура­лы жалған ақпарат тарады. Еш­қандай кибер­шабуыл болма­ғанын хабарлаймыз, клиент­тердің қаражаты түгел­дей өз қал­пында және ақау ретке кел­­тірілгеннен кейін қосым­шада дұрыс көрсетіледі», деді аталған банктің баспасөз хатшысы Ербол Азанбек.

Расында, көп ұзамай қосым­шаның қызметі қалпына кел­ді. Бірақ бәрібір сыр берген жүйеден секем алып қалғандар банктегі есепшотының қауіп­сіз­­дігіне алаңдаушылық білді­ріп жатыр. Ши шыққан сол ша­ма­лы уақытта халық шулап кетіп, біраз фейк ақпараттар да тарап үлгерді. Қосымшадағы іркі­ліске қатысты әзіл-шыны ара­лас әңгімелер әлеуметтік желі­нің сол күнгі тақырыбына айналды.

Банк өкілдері орын алған бұл олқылық үшін кешіріп сұрап, 29 қазан мен 4 қараша аралығында Kaspi QR арқылы жасалған әрбір төлем үшін 5% бонус сыйлайтынын хабарлады.