«Хантәңірі», «Қарадала» халық театрларының ашылуы ауыл мәдениетінің дамуына ғана емес, жаңа жұмыс орындарының да ашылуына ықпал ететін болады.
Жетісу өлкесінде қос театрдың шымылдығының ашылуы өнерге сусаған жұртшылықты бір серпілтіп тастағаны анық. Мұнымен қоса жыл соңына қарай халық театрларының қатары тағы көбейетіндігі жайындағы жаңалық облыс халқы үшін үлкен сый болып отыр.
Өткен ғасырдың тоқсаныншы жылдарының соңын ала жабылып қалған «Нарынқол» халық театры «Хантәңірі» театры болып қайта ашылып, Бикен Римова атындағы Талдықорған драма театрында ақиық ақын Мұқағали Мақатаевтың «Аққулар ұйықтағанда» поэтикалық-сазды драмасымен алғашқы қойылымын бастады. Қойылымда Қарасаздан түлеп ұшқан қос ақын Мұқағали мен Еркін Ібітанов бейнелері қайта қауышты. Ал Ұйғыр ауданындағы «Қарадала» халық театрының тұсауы А.Құнанбайұлы поэмасының желісімен сахналанған «Ескендір» қойылымымен кесілді.
Осы екі театр ісінің жанданып, көрерменімен қауышуына мұрындық болған Қазақстанның еңбек сіңірген қайраткері – Асқар Наймантаев. Балалық шағы осы театрдың тарихымен байланысты айтулы өнерпаздың әкесі Әбдіғалым Наймантаев «Нарынқол» халық театрында режиссер болып еңбек етсе, анасы Рафия Райжанова сол халық театрының әртісі болып қызмет атқарған.
«Хантәңірі» театры болып құрылған өнер ордасы шымылдығының «Аққулар ұйықтағанда» шығармасымен ашылуы әрі Мұқағали Мақатаев пен Еркін Ібітанов есімімен байланысты болуы кездейсоқтық емес. Сонау елуінші жылдардың соңында Шалкөде ауылында мұғалім болып тұрғанында Мұқағали ағамыз бен Лашын Мұратқызы көркемөнерпаздар үйірмесінде Қыз Жібек пен Төлегенді ойнаса, Еркін ағамыз аудан орталығында 1957 жылы көркемөнерпаздар үйірмесін ашқанын әлі күнге аудан жұртшылығы ұмыта қойған жоқ. Осылайша, аудандық театр 1960 жылы құрылып, 1963 жылы халық театры атағын алған.
«Басшысы, құрамы, сахнаға қызмет жасау мамандары кәсіби мамандардан құралса кәсіби театр болып шығады. Әлем театрларының тарихы бойынша барлық театр ең әуелі халық театры болып ашылғаны белгілі. Мен екі театрдың ашылуына көмек жасадым. Ендігі кезекте театрға екі аудан өздері ие, өздері басшы. Қызметке алатын да өздері. Әрі қарай қолымнан келгенше көмегімді аямаймын. Бастаған істі тастамаймын да. Бұған дейін облыста ашылған театрлардың әрқайсысында оннан астам штаты бар. Сондықтан да жаңа ашылған театрлардың алдында үлкен жоспарлар тұр. Жастардың да талабы ерекше қуантады. Көрген дүниесінен қорытынды шығарып, бастамаларды қолдап кетуге даяр-ақ тұр» деген Асқар Наймантаев «Хантәңірі» мен «Қарадала» халық театрлары ашылды деген сәттен «театрға алыңызшы» деген өтініштердің көп болғандығын айтады. Олардың қатарында қолынан іс тігу келетін шеберлер де, зергерлер де бар. Жұмысқа сұранған жастардың өтініші көбейгендігіне қуанышын жасырмаған А.Наймантаев ағымдағы мерекелермен қатар, келер жылы наурызда облыстық халық театрлар фестивалі өтетіндігін жеткізді. А.Наймантаевтың айтуынша, театр екі адамнан құрылатын отау емес, үлкен өндіріс. Сондықтан да Райымбек, Ұйғыр аудандық әкімшіліктері де жаңа жұмыс орнын ашуға дайын. Осы екі театрдың аудан әкімдіктері мен өнерге жанашыр азаматтардың қолдауының арқасында ашылғаны белгілі. Сол сияқты мамандар келе қалса, театр емес, өнер мектептерінде де жұмыс табылады. Ең бастысы мәдениетке сусаған өңірде өнер қозғалысы басталды. Енді осыны әлсіретіп алмай, ақылдасып отыратын іс көп. Егер де жастар осы қарқынмен жұмыс істей білсе, ауданда өнердің қанат жаятынына сенім мол.
Алматы облысы