Ерен еңбекті екшеген

Қазір қалаған кітабыңды қолға түсіре алмайсың. Баспасөз арқылы хабарланып, оқуға құмартып жүрген кітаптарымның бірі Мах­мұт Қасымбековтің Тұңғыш Пре­зи­дентіміз Н.Ә.Назарбаевтың еңбек, өмір жолы туралы туындысы болатын. Мені бір жағынан бірнеше жыл Елбасының күнделікті ісіне тікелей куәгер азаматтың баяндауы қызықтырған еді.

 

ЭФИРГЕ ШЫҚҚАНША АСЫҒАМЫН

Қазір қалаған кітабыңды қолға түсіре алмайсың. Баспасөз арқылы хабарланып, оқуға құмартып жүрген кітаптарымның бірі Мах­мұт Қасымбековтің Тұңғыш Пре­зи­дентіміз Н.Ә.Назарбаевтың еңбек, өмір жолы туралы туындысы болатын. Мені бір жағынан бірнеше жыл Елбасының күнделікті ісіне тікелей куәгер азаматтың баяндауы қызықтырған еді.

Шындығын айтқанда, көр­нек­ті тұлға жөнінде кітап жазу, оқырмандарға мемлекет басқару сынды күрделі міндет­тің көп­шілігімізге белгісіз қыр-сырларын жеткізу, өзіміз мақтан етердей елі­міздің өсіп-өркендеуіндегі, әлем алдында бедел-абыройын асы­ру­дағы қиын қызметтің астарын ашу екінің бі­рінің қолынан келе қоймас, келген күннің өзінде соған тәуекел ету де азаматтық ерлік­тей ғой.

Бұрыннан құлақтанып жүрген кітабымның тараулары «Шалқар» радиосы арқылы оқыла бастауына қуанып қалдым. Қазір көз нұры төмендеп, бұрынғыдай ұзағынан тесіліп оқуға мүмкіндік азайған шақта диктордың құлаққа жағымды дауысымен әсерлі оқылуы, музыка үнімен көркемделуі күннен-күнге баурап барады. Аталған радионың, әсіресе, «Алтын қорынан» бе­рі­летін хабарларын бұған дейін сүй­сіне тыңдаушы едім. Бұл да бір көңілімізден шыққан үрдіс бол­ды. Меңінше, оны таспаға жазып алып, мектеп оқушыларына тың­да­тып, арнаулы сабақ өткізу ұйым­дас­тырылса артықтығы болмас еді.

Тәуелсіздік жылдарында Ота­ны­мыздың көтерілген биігі ерте­гіге бергісіз екенін бәрін салыс­тыра қарайтын, көпті көрген аға буын ерекше мақтан тұтады. Мұ­ның бәрі маңдайымыздың бақытына бұйыртқан көреген басшымыз, кемеңгер саясаткер Нұрсұлтан Әбішұлы Назарбаевтың қажырлы еңбегінің жемісі деп білеміз. «Жақсының жақсылығын айт, нұры тасысын» дейді халқымыз. Сүйік­­ті «Шалқар» радиосының әр кештегі осынау хабары эфир­ге шыққанша асығамыз.

Сартбай ТӨКЕНОВ,

зейнеткер.

Қарағанды облысы,

Жаңаарқа ауданы,

Сәкен Сейфуллин ауылы.

 

«ШАЛҚАР» ШАҢЫРАҒЫНАН ШАШЫЛҒАН ШАТТЫҚ

Радио тыңдау менің бала кезімнен бергі әдетім. Сол кезеңдері ауылдық жердің негізгі құралына, сәніне айналған радио үні – біз үшін құлақсіңді үн. Қазіргі таңда түрлі ақпараттық құралдар қатары көбейіп, тіпті, әлемнің әр қиырынан үлкенді-кішілі хабар-ошарды көзді ашып-жұмғанша жеткізіп тұрған ғаламтор мүмкіндігі шексіз болғанның өзінде, мен радио тыңдау дағдымнан жаңылған жоқпын.

Әрбір күнді егемен еліміздің Әнұранымен бастап, «Қайырлы таң, Қазақ елі!» деп әуе тол­қынында қалың қазақпен аман­дасатын «Шалқар» радиосы радио тыңдайтын барша тың­дарманға таныс деп білемін. Алуан бағдарламалары бар, қа­зір­гі күннің өзекті мәселелерін тақы­рып етіп, әңгіме, талқылау алаңына алып шығып отыратын радиодағы «Ел және Елбасы» бағ­дарламасы – орны бөлек дү­ние. Біздің еліміз үшін қазір, ең бас­тысы, тәуелсіздікті қадірлеу, мем­лекетіміздің нығаюын әрбір адамның перзенттік парыз ретінде ұғынып, үлес қосуы, бүгінде әлемге өз үнін естіртіп, жақсы қада­мымен таныла бастаған еліміз­дің көш басында тұрған тұлға – Тұңғыш Президентіміз Н.На­зар­баевтың саясатын қолдап-қуаттау деп білемін. Осы орайда елі­міздің өткенін бүгінмен сабақ­тастырып, тәуелсіздік алған 22 жыл ішіндегі толағай табыстар, оған жету жолындағы қиындықтар туралы жан-жақты мәлімет беретін бұл бағдарлама – ұрпақ үшін де құнды ақпарат көзі. Мен, әсіресе, ұстаздардың осы бағдарламаны тыңдап, мектептерде оқушылардың отансүйгіштік қырын дамыту үшін қолдануына, сабақтың ыңғайына, талабына қарай пайдалануына кеңес берер едім.

Қазіргі қазақ қоғамындағы Елбасы рөлін, оның жас мем­ле­ке­­тімізді аяғынан тұрғы­зу бағы­тындағы ерен істе­рін танытудағы аталған бағдар­ла­маның маңызын қуаттай отырып, осы композицияға ар­қау бол­ған М.Қасымбеков кітабы­ның құндылығы зор десек, қателес­пейміз.

Еліміз сара жолынан жаңыл­масын, елдік абыройымызды асырып, ұрпақ тәрбиелеуге жақсы істерімен атсалысар айбарлы азаматтар аман болсын деймін.

Гүлжан ИСМУРЗИНА,

облыстық Қазақстан халқы Ассамблеясы хатшылығының

басшысы.

Ақтау.

 

ӨРЕЛІ ӨМІР – ӘРКІМГЕ ӨНЕГЕ

«Шалқар» радиосынан Махмұт Қасымбековтің «Елін сүйген, елі сүйген Елбасы» кітабы бойынша жасалған радиокомпозицияны басынан бастап тыңдап келемін. Таңғы 07.30-дан бастап, түн ортасына дейін бірнеше рет беріледі. Қазақстан Республикасының еңбек сіңірген әртісі Шолпан Бай­ғабылова мен Аманжан Ең­себаев нақышына келтіріп оқы­ғанда Елбасы туралы шығарма құл­пыра түскендей болады. Осы шығарманы оқудың сәті менің Мәскеудегі М.Шепкин атындағы жоғары театр училищесін бір­ге тәмамдаған курстасым, әріп­те­сім Шолпан Байғабылқызы мен байырғы диктор Аманжан Серік­ұлына бұйырғанына да қуаны­ш­тымын.

Мен негізі радио тыңдағанды бұрыннан дұрыс көремін. Радио, біріншіден, ешкімнің уақытын алмайды, кез келген кісі шаруасын істеп жүріп-ақ барлық ақпараттан қалыс қалмайды. Қазір үйде Елбасы Нұрсұлтан Назарбаев туралы радиокомпозицияның эфирге шығатын кезін күтіп отырамын. Шіркін-ай, осы шығарманы жастар жағы қалай тыңдап жүр екен?! Елбасының өнегелі өмірі жөнінде көбірек білу бізден бұрын соларға керек. Шығарма біздің заманымыздағы аса ірі тұлғаның бала кезінен басталады. Тыңдап отырып, оның алдына мақсат қоя білгені, алдағы өмірін шынайы армандағаны мені қатты қызықтырды. Ол Президент боламын деп армандаған жоқ, еліне, жеріне пайдасы тиетін адам боламын, қазақ деген халықтың атына кір келтірмес ер боламын деп алға ұмтылды. Сонымен қатар, жас Нұрсұлтанның батыл шешімдерге баратын тәуекелшіл, өжеттігі де екінің бірінің бойынан табылмайтын қасиет.

Қазір біздің жастарымызда алға мақсат қоя білу кемшін емес пе деген ой келеді маған. Бойда қуат, жүректе жалын бар жастық шақта неге алға ұмтылмасқа? Жастық шақ екі айналып келмейді. Шығарманы тыңдап отырып менің түйгенім, Нұрсұлтан Әбішұлы жас кезінен бастап уақытты бағалай білді. Өмірдің өзі қамшының сабындай қысқа уақыт емес пе? Ол әр күнін, мүмкін, әр сағатын бос жібермеуге тырысты. Бәлкім, Назарбаевтың биік шыңдарды бағындыруының себебі де осында жатқан шығар? Шығармада Президенттің өсу жолдары тамаша беріледі. Оның биікке бастаған жолы тақтайдай тегіс те болған жоқ. Түйіні мықты сәттердің шешім табуы шығармада жақсы суреттеледі.

Радиокомпозицияның тілі, му­зы­камен көркемделуі, берілу пішіні маған өте ұнады. Оны жұрт­шылықтың тыңдауын қа­лар едім. Бір рет тыңдаған кісі жалға­сын күтіп отырарына тағы кепіл­мін.

Қайыпберген ЕСЕНҒҰЛОВ,

І.Омаров атындағы

облыстық қазақ драма

театрының актері.

ҚОСТАНАЙ.

 

СЫЛДЫРАП ӨҢКЕЙ КЕЛІСІМ

Ресейден ата-баба қонысына көшіп келгенімізге біраз болды.Қазір бәйбішем екеуміз сырттан келген ағайындарымыз үшін арнайы салынған Бәйтерек ауылында тұрып жатырмыз. 150 түтіні бар елді мекенде Өзбекстаннан, Ресейден жеткен отандастарымыз өз тағдырларын тоғыстырған.

Мұны айтып отырған себебім, өзіміз күнде тыңдайтын радиодан Тәуелсіздігіміздің елең-алаң шағында Елбасымыздың жанынан табылып, сенімді серігі бола білген қоғам қайраткері Махмұт Қасымбековтің «Елін сүйген, елі сүйген Елбасы» атты танымдық кітабынан берілген циклды әңгімелерді тыңдай отырып, үш елдің бірі ретінде Қазақстанның өз қандастарын қарсы алудағы Ұлы көштің қалай басталғаны жайлы көп мағлұмат алдым. Мемлекет басшысының балалық шағынан бастап сұңғыла саясаткер, дана көшбасшы дәрежесіне дейін көтерілген тұлғасы қарапайым тілмен суреттелген. Әр күн сайын түс мезгілінде отбасымыз болып тағатсыздана тосамыз.

Тоқсаныншы жылдар менің де көз алдымда. Туған жерге буынып-түйініп, қанша оралуға ұмтылсақ та, қалай қарсы алар екен деген түйсік пен сенімсіздік іштей тежей берді. Алдымен балаларды аттандырып, сосын өзіміз атбасын бұрдық. Шынын айтсам, дәл осындай құрметке бөленеміз, жайлы баспанаға ие боламыз деп еш ойламап едік. Елге келгенімізге еш өкінбейміз. Махмұт бауырым осы кезеңді айнытпай сипаттаған, Нұрсұлтан Назарбаевтың «Жар басында тұрған едік» деген теңеуін әдемі келтірген.

Өз басым «сылдырап өңкей келісім» дегендей, осындай танымдық хабарлардың радиодан үзілмеуін тілеймін. Өйткені, кітапта Президенттің қарапайым халық біле бермейтін қасиеттері, күрескерлік тұлғасы көркем тілмен баяндалған. Бүгінде екінің бірі кітап оқи бермейтіні аян. Оған уақыт та тапшы, енжарлығымыз да жібермейді. Олай болса, радио арқылы да жастарымызды адамгершілікке, асыл қасиеттерге, елді, жерді, Отанды сүюге үндеуге болатынына әбден көзім жетті.

Қайролла СҮЛЕЙМЕНОВ,

еңбек ардагері.

Солтүстік Қазақстан облысы,

Қызылжар ауданы,

Бәйтерек ауылы.