Қостанай облыстық полиция департаментінде өткен жиында аймақтағы тергеу қызметінің 10 айлық жұмысы қорытындыланып, жалпы ішкі істер органдары қызметін цифрландыру мәселесі қаралды.
Басқосу барысында департамент бастығы Бекет Аймағамбетов таяуда Мемлекет басшысы Қасым-Жомарт Тоқаевтың төрағалығымен өткен ІІМ-нің кеңейтілген алқа отырысында тәртіп сақшыларына жүктелген жаңа міндеттер туралы сөз етті.
– Ішкі істер органдарында жүзеге асырылып жатқан реформалық өзгерістердің түпкі мақсаты – заңның сақталуы мен азаматтардың әділдікке қол жеткізуін толық қамтамасыз ету. Әрбір тергеуші қылмыстық істі қарау барысында кеткен кішкентай ғана қателік адамның бүтін тағдырын өзгертіп, тәлкекке ұшыратуы мүмкін екенін қаперіне ұстауы қажет. Бұл туралы Президент Жолдауында да айтылды, – деді Б.Аймағамбетов.
Жалпы, облыс тергеушілері жыл басынан бері 3 300-ден астам қылмыстық істі тергеп, сотқа жөнелткен. Жиында тергеу саласындағы сыбайлас жемқорлық тәуекелдерін жоюдың ең тиімді жолы қылмысты тергеу барысын электронды форматқа көшіру екені айтылды. Бұл бағытта біраз шаруа тындырылып, облыс тергеушілері бір жыл бұрын жаңа компьютерлермен, веб-камералармен қамтамасыз етілген. Қазірдің өзінде департамент қарауындағы қылмыстық істің 53,8 пайызы электронды түрде қашықтан тергеліп жатыр.
Мәселен, Қарасу аудандық полиция бөлімі бастығының орынбасары Павел Белов қазіргі тергеушілердің заманауи техникалық мүмкіндіктермен барынша қамтамасыз етіліп жатқанын, соның нәтижесінде, жыл соңына дейін аса ауыр санаттағы қылмыстық істерді қоспағанда, барлық істердің 70 пайызын электронды форматта тергеуге қол жететінін айтты. Оны басқа аудандар мен облыс орталығындағы тергеушілер мен анықтаушылар да қоштап отыр.
– Полиция жұмысындағы ең басты қасиет – кәсіби білік пен адал еңбек. Азаматтарға құрметпен қарау, іске қатысушылармен кездесуге, тергеу экспериментіне және жауап алуға мұқият дайындалу. Сіз іс бойынша түпкілікті шешім қабылдайсыз, бүкіл полицияның беделі осыған байланысты, – деді Б.Аймағамбетов.
Жиынның соңына таман аймақтың үздік тергеушілері мен анықтаушылары алғыс хаттармен және атаулы сағаттармен марапатталды.
Биыл Қарасу аудандық полиция бөлімі бастығының орынбасары Павел Белов, Рудный қаласы ПБ аға тергеушісі Бақтияр Сейітбеков, Қостанай ауданы ПБ-ның аға тергеушісі Анастасия Рогожиналар облыстың ең үздік тергеушілері ретінде танылып отыр. Мысалы, полиция майоры Б.Сейітбеков жыл басынан бері жалпы саны 25 ауыр және аса ауыр қылмыстарды тергеп, істі аяғына жеткізіп, сотқа жіберсе, Тобыл қаласының тергеушісі, капитан А.Рогожина 45 қылмыстық істі ашқан.
Қостанай облысы