Істің көзін тауып, шаруасын оңқай асықтай үйіріп отырған кәсіпкерлердің қарақан басының қамын ғана ойламай, қалың ормандай қалың елінің әлеуметтік-тұрмыстық жайына, ел болашағы балалардың спортпен айналысуына жанашырлықпен көңіл аударып, қолынан келгенінше көмек көрсетуі азаматтық!
Өткен жылы Сандықтау ауданында ауыз толтырып айтуға әбден лайықты бірнеше жоба жүзеге асып, ел мерейін көтеріп тастады. Осы бір жанашырлық істер болашаққа деген сенімді нығайтып, ел ішіндегі ынтымақ пен ауызбірлікті одан әрі бекіте түсетіні бар. Тіпті желкілдеп өсіп келе жатқан жас ұрпақты отаншылдыққа баулудың оңды мысалы деп айтсақ та артық емес.
Бастрымовка елді мекеніндегі селолық клуб көп уақыттан бері жөндеу көрмей, әбден тозып, қаусап қалған болатын. Клуб үйі жалғыз мәдениет орталығы ғана емес, елдің ішкі саясатын насихаттап, жалпақ жұртты ұлы мұраттарға бағыттайтын орын емес пе? Міне, осы селолық клуб жергілікті кәсіпкерлердің қоғамдаса жасалған қайырымдылығының арқасында 21 млн теңгеге жөнделіп, құрылысшының қалағынан жаңа шыққан нысандай жайнап тұр. Сыртқы кейпі ғана емес, ішкі мазмұны байып, сан түрлі мәдени-көпшілік жұмысы да алға басуда. Осы елді мекенде Ұлы Отан соғысы ардагерлеріне жаңадан ескерткіш бой көтерді. Ауыл адамдары аталарының аруағын сыйлаған қамқор жандардың ісіне разы болысты. Отан қорғау жолында шейіт болған боздақтардың есімдері таңбаланып жазылып, кейінгі ұрпақтың есіне ел қорғаудың айрықша қасиетті ұғым екенін салып тұрғандай. Өткенге құрмет – кейінгіге парыз.
Спасское селосында медицина қызметкерлеріне арналып 20 млн теңгеге екі пәтерлі үй салынды. Ауылдық жерде медицина қызметкерлерінің жағдайын ойлау – ең алдымен, халықтың денсаулығын ойлау деген сөз. Шалғайдағы шағын елді мекендерге медицина қызметкерлерінің тартыншақтап баратыны баспананың жоғынан екені белгілі. Аудан кәсіпкерлері осы бір жайды қаперлерінен шығармай, халықтың денсаулығы үшін тамаша іс атқарып отыр. Жаман тұмау жан алқымнан алған бүгінгі кезде бұл да – аса қажет дүние. Тағы бір екпін түсіріп айтатын жайт, Спасское ауылында қоғамдық моншаға күрделі жөндеу жұмыстарын жүргізу үшін 25 млн теңге көлемінде қаражат жұмсалыпты. Мұндай қамқорлықтан ауылдағы білім ошағы да тыс қалмаған. Мектеп қазандығы үшін 5 млн 300 мың теңге қаржы бөлініп, жаңа қазандық салынған. Енді мектеп оқушылары қақаған қыс айларында бұрынғыдай жаурамай, алаңсыз білім алады.
Бар жақсылықты балаларға жасауға ұйғарған азаматтар Красная поляна селосында балаларға арналған спорт алаңын салып берді. Шындығын айтқанда, мұндай спорт алаңдары көптеген ірі елді мекенде де кездесе бермейді. Қазір ауыл шетіне табан іліктірсеңіз, металдан жасалған әдемі де салтанатты қақпа мен жол жиегін өрнектеген ұзындығы 200 метрге дейін созылатын қоршауды көрер едіңіз. Бұл іске 4 млн теңге жұмсалған. Ал Арбузенка ауылындағы мектеп жасына дейінгі балаларға арналған мекеме туралы айтсақ ше? Іші кірсе-шыққысыз, құрқылтайдың ұясындай жып-жылы шағын орталықты салуға жергілікті кәсіпкерлердің қалтасынан 12 млн теңге қаражат бөлінген. Болашақ ұрпақ жайын ойлаған қалталы азаматтар Красная поляна орта мектебіне отын-көмір сақтайтын құны 500 мың теңгелік қойма да салып беріпті.
Ел ішінде қатынау да қиын болып келген. Осы бір кемшіліктің кетігін толтырмақшы болған іскер азаматтар Белгород селолық округінің тұрғындары аудан орталығы – Балкашино селосына уақтылы қатынап тұру үшін 10 млн теңгеге «Газель» автокөлігін сатып алып беріп, жүргізіп отыр.
Осы орайда аудандағы жомарт жандардың бірі әрі бірегейі ретінде «Спасское агро» серіктестігінің директоры Махмуд Абуев туралы айрықша тоқталып айта кетуге тиістіміз. Жоғарыда біз разылық пейілмен тізіп айтқан жанашырлық көмекті осы серіктестіктің басшысы жасап отыр. Бар қаражат серіктестік есебінен жұмсалған.
Махмуд Магомедович тәрізді туған жерінің түтінін түзу ұшыруға адамгершілік ажарымен, кісілік келбетімен, жомарт пейілімен жанашырлық танытып отырған абзал азаматтың бірі – Александр Закусилов. Ол – «Свободное» серіктестігінің директоры. Ел қамын жеген елгезек жан өткен жылы Новогородский селолық клубы наурыз мерекесін атап өтер кезде 580 мың теңге беріп, туған жердің төсінде тағылымы мол шараның жоғары деңгейде тойлануына көмек қолын созды. Мұндай көмекті Александр Александрович аудандағы Владимировский, Максимовка селолық Мәдениет үйлеріне де көрсетті. Жалғыз той тойлау ғана емес, одан өзге уақытта да ауылдағы мәдениет ошағының оты маздап жануына жүрек жылуын төгіп, қайырымды қолын созуда. Сөзіміз дәлелді болуы үшін бірер дерек келтіре кетелік, серіктестік басшысы Новогородский селолық Мәдениет үйіне ағымдағы жөндеу жұмысын жасап берді. Максимовка елді мекеніндегі селолық Мәдениет үйінің күрделі жөндеу жұмысына 3 млн 274 мың теңге мөлшерінде көмек көрсетті. Осы селолық округтің хоккей командасы үшін спорт киімдері, спорттық құрал-жабдықтарды сатып алуға 10 млн теңгеден аса қаражат бөлді.
Қалай разы болмассыз. Осы өлкедегі жомарт жердің игілігін көргеннен кейін бар ырысты бір өзі бауырына басып қалмай, сол жерде түтін түтетіп отырған ауыл-аймақтың ажарын түзеуге белсене атсалысуда. Осы бір өнегелі ісі өңірдің өзге пұшпағында игілікке қолы жетіп отырған іскер адамдарға үлгі деп айтсақ, артық болмас.
Аудандағы атымтай жомарттығымен аты шыққан жанның бірі – «Байдалы» серіктестігінің басшысы Бағдат Оразалин. Бағдат Байдалыұлы Веселовский орта мектебінің жас ұстаздары үшін 30 млн теңгеге алты пәтер салып берді. Өз серіктестігінің бір маманына да құны 20 млн теңге шамасындағы тұрғын үйді сыйға тартты. Ауыл жанындағы аудандық маңызы бар көпірді 10 млн теңгеге жөндеп, тұрғындарға қолайлы жағдай туғызып отыр. Ағайынды Марат Оразалин екеуі жанашырлықтан жарысқа түскендей әсер қалдырады. Марат Амангелдіұлы – «СПХ Байдалы-2» серіктестігінің басшысы. Ол селолық округке аса қажетті жедел жәрдем автокөлігін 6 млн теңгеге сатып алып, сыйлады. Осындағы орта мектептің жас спортшыларына 2 млн 200 мың теңгеге спорт жабдықтарын алып берді.
Әр ауыл, әр елді мекенде ақық дән өсіріп, ақтылы мал бағып, еңсесін тіктеген ел азаматтары туған жердің төсін түлетуге дәл осылай үлес қосса, тұтас ел, байтақ дала әлдеқашан гүл жайнап, тіршілік қайнап, өмірдің өңі оңынан өзгеріп кетер еді.
Ақмола облысы,
Сандықтау ауданы