Абайдың 175 жылдығында Күршім көркейе түсті. Шекара шебіндегі ауданда Абай атында алаң ашылып, ақынның тұлға мүсіні орнады.
Алаңның қақ ортасына қойылған хакімнің қоладан құйылған ескерткішінің жалпы биіктігі – 6 метр. Күршім ауданының орталығында осыған дейін ұлы Абайдың есімі берілген бірде-бір нысан болмаған екен.
Ақын рухына құрмет ретінде аумағы бірнеше гектарды алып жатқан орталық алаңға Абайдың есімі берілді. Ұлы ойшылдың атындағы саябақ толық абаттандырылып, жан-жағы түнгі уақытта самаладай жарқырады.
Жарты әлемді жайлаған індеттің беті қайтып, халық баяғы тіршілігіне оралған соң бұл алаң мерекелік кештер ұйымдастыруға таптырмас орын болмақ. Көрікті орынға кәсіпкерлердің көмегімен ұзындығы 20, ені 10 метрлік су бұрқақ салынды. Жай су бұрқақ емес, әуезді ән шырқап, мың бұрала би билейді.
– Аудан орталығының ажары кіріп, көшелердің жөнделіп жатқаны қуантады. Жаңадан бой көтерген ескерткіштің, ертеңгі өсіп келе жатқан ұрпақ үшін өте маңызды. Кішкентайынан Абайды танып, өлеңдерін, ғибратты сөздерін оқып өссе жаман болмайды, – дейді аудан тұрғыны Мейрамгүл Қозыбаева.
Сонымен қатар ауданы орталығы Күршімде төрт көшенің жолы толық жөнделіп, абаттандырылды. Бұл жұмыстардың бәрі шекаралық аудандарды дамыту бағдарламасы бойынша атқарылды. Ал аудандағы жалпы елді мекендердің инфрақұрылымына биыл 5 млрд теңгеге жуық қаржы бөлінді. Ендеше, алдағы уақытта Күршім өңірінде әлі де ауқымды жұмыстар атқарылады.
Шығыс Қазақстан облысы,
Күршім ауданы