Ұлттық музейдің атриумында еліміздегі ең айтулы мереке Тәуелсіздік күніне арналған «Алтын қыранның» жарық-дыбыстық қойылымы өтті.
Іс-шараның мақсаты – музей саласын дамытуда заманауи жетістіктерді кеңінен пайдалану арқылы ұлттық-рухани және тарихи-мәдени құндылықтарды дәріптеу.
Қазақстанның мемлекеттік туын бейнелейтін аспан іспеттес көгілдір түстің аясында егемендігіміздің басты нышанына айналған жиырма метрлік «Алтын қыран» жайылып тұр.
Геральдика дәстүрінде аспанға ұқсас көгілдір түс – заңғар биіктікті, бейбітшілік пен молшылықты, күн – байлық пен құнарлылықты, ал қыран бейнесі – күшті, билікті және қырағылықты білдіреді.
Кіреберістегі сол жақ қабырғада орналасқан Қазақстан картасы бейнеленген үлкен медиа-экраннан – еліміздің жазиралы жазығы мен сайын даласы, сондай-ақ мәдениет, спорт және өнердегі жетістіктерге арналған бейнеролик көрсетілді.
Алтынмен қапталған қыран құс пен тәуелсіз мемлекетіміздің жетістіктеріне арналған бейнекөрініс, кімнің болсын кеудесінде еліне деген мақтанышын оятып, патриоттық сезімін арттырары сөзсіз.
Айта кетейік, ұлттық музейде «Алтын қыранның» жарық-дыбыстық қойылымы Тәуелсіздік күнінің қарсаңында жыл сайын дәстүрлі түрде өтпек.