«Қазақстандық отбасылар-2020» ұлттық баяндамасының жобасы сараптамалық талқылаудан өтті. Құжатты Ақпарат және қоғамдық даму министрлігінің тапсырысы бойынша «Рухани жаңғыру» қазақстандық әлеуметтік даму институтының отбасы институты зерттеу орталығымен бірлесіп әзірледі.
Зерттеу барысында қазақстандық отбасылардың жағдайы талданып, еліміздегі отбасылық саясатты жетілдіру бойынша ұсыныстар әзірленді. Іс-шараға Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі ұлттық комиссияның төрағасы Ләззат Рамазанова, Ақпарат және қоғамдық даму вице-министрі Асхат Оралов, сондай-ақ Беларусь, Өзбекстан, Украина, Тәжікстаннан келген қазақстандық және халықаралық сарапшылар қатысты.
Ләззат Рамазанова өз сөзінде «Ұлттық баяндама отбасы саласында жұмыс істейтін әрбір маманның анықтамалық кітабы болуы керек», деді. Ол есептің негізгі тұжырымдарын ескере отырып, Қазақстанда 2030 жылға дейінгі отбасылық-гендерлік саясат тұжырымдамасын (екінші кезең: 2020-2022) іске асыру жөніндегі іс-шаралар жоспарын жаңартуды ұсынды.
Тұтастай алғанда, іс-шараға қатысқан сарапшылар аталған құжаттың маңыздылығын айтып, ұлттық баяндаманы дайындау сапасына жоғары баға берді.