Атырау қаласында патрульдік полиция қызметкерлері 1 млн және 2 млн теңгеден асатын айыппұлы төленбеген екі автокөліктің иесін анықтады, деп хабарлайды Egemen.kz.
«Мәселен, 6 қаңтарда полиция қызметкерлері Азербайжан Республкасында тіркелген Lexus GX470 маркалы көлікті тоқтатты. Тексеру кезінде көлікті Грузия Республикасының 39 жастағы азаматы басқарғаны анықталды. Аталған көлік иесінің 2 млн теңгені құрайтын 123 айыппұлын төлемегені белгілі болды. Ал, 7 қаңтарда Армения Республикасында тіркеуде тұрған «Toyota Ipsun» маркалы көлігі тексерілді. Бұл көлікті басқарған жүргізушінің 1 млн 63 980 теңгені құрайтын 35 айыппұлын төлемеген болып шықты» - деп хабарлады департаменттің баспасөз қызметі.
ҚР Әкімшілік құқықбұзушылық туралы Кодексінің 785-бабына сәйкес, екі көлік арнаулы айып тұрағына қойылды.