Президенттің міндетін атқарушы, Жогорку Кенеш спикері Талант Мамытов премьер-министр мен Үкіметтің өкілеттігін тоқтату туралы Жарлыққа қол қойды. Бұл туралы Мемлекет басшысының сайтында хабарланды.
Хабарламада президент сайлауы нәтижелерінің ресми жариялануына және Садыр Жапаровтың премьер-министр өкілеттігін тоқтату туралы өтініш беруіне байланысты Талант Мамытов оны Үкімет басшысы қызметінен босатқаны атап өтілді. Жарлық бойынша Үкіметтің қазіргі құрамы отставкаға кетті. Ал оның мүшелері жаңа құрам құрылғанға дейін өз міндеттерін атқаратын болды. Қырғызстан премьер-министрінің міндетін Артем Новиков атқарады.
Садыр Жапаровтың президент сайлауының ресми қорытындылары шығарылғаннан кейін премьер-министр өкілеттігін тоқтататыны осыған дейін айтылған еді. Конституцияға сәйкес Үкімет толық құрамда отставкаға кетуі тиіс.
Қырғызстан президентінің мерзімінен бұрын сайлауы 10 қаңтарда өткен еді. Орталық сайлау комиссиясының ресми қорытынды мәліметіне сәйкес Жапаровқа 1,1 миллионнан астам адам немесе сайлау учаскелеріне келген сайлаушылардың 79,2 пайызы дауыс берген.
Елдегі биліктің ауысуы былтыр 6 қазанда халық наразылығынан кейін болған-ды. Нәтижесінде, Садыр Жапаров премьер-министр болып сайланған. Кейінірек президенттік сайлауға қатысуға ниет білдірген Үкімет басшысының өкілеттігі бірінші вице-премьер Артем Новиковқа уақытша жүктелген-ді.
Ал елдің алтыншы президентін ұлықтау рәсімі 28 қаңтарға белгіленді.