Біз Мәңгілік Елдің іргетасын қаладық. Мәңгілік Елдің жүрегіне айналған мәңгілік Астанамызды тұрғыздық. Мәңгілік мызғымас экономика қалыптастырып, Мәңгілік өшпес жылнама жаздық. Мәңгілік болашаққа жол салдық. Осының барлығы тәуелсіздігіміздің тартуы, азаттығымыздың асыл қазынасы.
Нұрсұлтан НАЗАРБАЕВ.
Атажұрттың қазығына байланған соң кіндігім,
Арқандаулы ат секілді шыр айналған тірлігім.
Таң атқаннан күн батқанша өз басымен әуре боп,
Арпалысқан бұл жалғанда ұғып жатыр кімді кім?
Қанатымды шаңға малып тіршіліктің қамы үшін,
Тауық та бір, мен де бірмін теріп жеген тарысын.
Бостандықтың бір тал шашы түсер болса егерде,
Қынабынан суырылар қылшылдаған намысым!
Жеткен жан жоқ қуғанменен мына дүние шетіне,
Пәни менен бақи барда бөлінесің екіге.
Азаттығым, тиер болса суық ызғар бетіңе,
Жүрегімді қалқан етем соққан желдің өтіне!
Несіпбек АЙТҰЛЫ,
ақын, Мемлекеттік сыйлықтың лауреаты.
АСТАНА.