Дүниежүзлік денсаулық сақтау ұйымының мәліметіне қарағанда, COVID-19-ға қарсы вакциналау қазір әлемнің 50-ден астам елінде жүргізіліп жатыр. Алғашқылардың қатарында ел азаматтарына үлгі көрсетіп, екпе алып жатқан көшбасшылардың ішінде вакцинаны екінші рет алушы да тіркелді.
БҰҰ Бас хатшысы Антониу Гутерриш: «COVID-19-ға қарсы вакцина рекордты мерзімде жасалғанымен, әлем жұртының қамтылуы біркелкі емес. Бақуатты елдерде екпеге қол жеткізу қиындық тудырмаса, кедей мемлекеттерде керісінше вакцина жоқ. Бұл вирустың мемлекеттік шекараға тәуелді емес екенін білеміз. Сондықтан әлем көшбасшылары бірінші кезекте күрестің алғы шебінде жүрген медицина қызметкерлерінің екпеден өтуін және бәріне бірдей қолжетімділігін ойлауы керек», деді пандемияға қатысты өткен аптада болған виртуалды іс-шарада.
ДДҰ алғаш мақұлдаған Phizer/BioNTech шығарған вакцинаны желтоқсанның ортасында Израиль премьер-министрі Биньямин Нетаньяху мен елдің денсаулық сақтау министрі тікелей эфирде салдырды. «Бұл – адамзаттың денсаулығы мен өмірі үшін қажет, екпе салдырыңыздар», дейді олар.
АҚШ президенті Джо Байден де міндетіне кіріспестен бұрын тікелей эфирде екпе жасатып: «Былайша, әдейілеп жалпы жұртқа әйгілеп салдыруымның себебі ертең вакцина жалпы жұртқа қолжетімді болғанда халық одан күмәнданып жүрмесін, дайын болсын деп жасаттым», деді. АҚШ вице-президенті Камала Харрис те вакциналаудан өтті.
Жыл басында Түркия президенті Реджеп Ердоған қытайлық препарат Sinovacты салдырса, Гвинея президенті Альфа Конде де ресейлік ғалымдардың өнімі «Спутник V» вакцинасын жасатты. Pfizer вакцинасын салдырғандардың қатарында Румыния президенті Клаус Иоханнис, Словакия президенті Зузана Чапутова, Грекия президенті Катерина Сакелларопулу, Чехия президенті Милош Земан бар. Ал 9 қаңтар күні Ұлыбритания патшайымы Елизавета II мен оның жұбайы принц Филипп те вакцина жасатты. Алайда Букингем сарайы олардың қай вакцинаны салдырғаны жайында мәлімет берген жоқ.
Жер жүзіндегі католиктердің бас ордасы Ватикан да вакцина жасатуды қолдап отыр. Рим папасы Франциск өзі алуымен бірге барлық діндес бауырларына «Этикалық тұрғыдан барлық адам екпе алуы тиіс деп санаймын, себебі сіз өзіңіздің ғана емес, жақындарыңыздың да өмірі мен денсаулығын қатерге тігесіз. Сондықтан екпе жасату – парыз», дейді.
Словакия президенті Зузана Чапутованың вакцинаны екінші рет салдырғаны жайында хабарлаған баспасөз хатшысы Мартина Стриженец президенттің 27 желтоқсанда алған алғашқы екпеден соң бұлшықеттері ауырып, шаршау белгілері байқалғанын, бірақ ондай болатыны жайында медиктердің алдын ала ескерткенін жеткізді.
Аргентина денсаулық сақтау министрі Хинес Гонсалес Гарсиа Алехандро «20 қаңтарда Посадас атындағы ауруханада «Спутник V» вакцинасы дозасын ел президенті Алберто Фернандеспен бірге алдым», деп жазды Twitter-дегі парақшасында. Аргентина президенті вакцина салдыруға елдің денсаулық сақтау министрлігі 60 жастан асқан адамдарға екпе салдыруға болады деген қорытындысы шыққан соң жасатыпты. Ал жасы 60-тан асқан алғашқы екпе жасатуышының қатарын Буэнос-Айрес провинциясының денсаулық сақтау министрі Даниэль Голлан толықтырған.
«Спутник V» бұл елге алғаш жеткен вакцина екенін айта кеткен жөн. Ресейдің Тікелей инвестициялар қоры Аргентина үкіметімен препараттың 10 млн дозасын жеткізу жөнінде шарт жасасқан екен. Соның алғашқы 300 мың партиясы былтырғы желтоқсанда жеткізіліп, 29 желтоқсаннан Аргентина медицина қызметкерлерін вакцинадан өткізуді бастап кеткен.